Լոռու մարզի Օձուն համայնքում սեպտեմբերի 24-ը մշակութային տոն էր. Սուրբ Աստվածածին եկեղեցու բակում ամփոփվեց «Համագործակցության եւ բարեկամության ներկապնակ» միջազգային գեղանկարչական փառատոնը, որին մասնակցում էին նկարիչներ ոչ միայն Հայաստանից, այլեւ Ռուսաստանից, Բելառուսից, Ղազախստանից, Վրաստանից, Էստոնիայից, Լատվիայից, Չինաստանից, Հարավային Կորեայից:
Նրանք 10 օր գիշերել են Օձունում, ստեղծագործել եւ տպավորությունները ներկայացրել կտավների տեսքով, որոնք տեղադրվել էին եկեղեցու բակում:
«Լոռին ինձ արդեն հարազատ է դարձել, որովհետեւ նախորդ տարիներին մեկ անգամ էլ եմ մասնակցել փառատոնին: Մենք այս ընթացքում ամեն օր նկարում էինք, հմայվում Հայաստանի գեղեցիկ բնությամբ, օձունցիների հյուրընկալությամբ»,-Aravot.am-ի հետ զրույցում ասաց Ղազախստանից ժամանած գեղանկարիչ Մարատ Տուրգընբայը: Նրան ամենից շատ տպավորել են լոռեցիների բարեսրտությունն ու ուշադրությունը: «Խոսքեր պարզապես չունեմ»,-փաստում է նա:
Փառատոնի կազմակերպիչ «Լոռվա ձոր» հայրենակցական միության ղեկավար Սերգո Երիցյանը հյուրերին պատվոգրեր հանձնեց: Արտասահմանցի որոշ նկարիչներ դարձան նաեւ ՀՀ նկարիչների միության պատվավոր անդամ: Երիցյանը շեշտեց՝ այս փառատոնի կարեւորությունն այն է, որ նկարիչները Հայաստանի մասին տպավորություններով եւ կտավներով հետագայում մասնակցում են այլ երկրներում կազմակերպվող ցուցահանդեսների:
Մանրամասն՝ տեսանյութում:
Լուիզա ՍՈՒՔԻԱՍՅԱՆ
