Կենտրոն եւ Նորք-Մարաշ վարչական շրջանների ընդհանուր իրավասության դատարանում այսօր «Իգլա»-ի գործով հերթական դատական նիստում ամբաստանյալներից ազատամարտիկ Սանասար Գաբրիելյանը հայտարարեց, որ իրենք չեն հանցագործները. «Տրուբայի (նկատի ունի խողովակաձեւ «Իգլա»-ն.-խմբ.) տերն ու տեղափոխողն են հանցագործները, մենք «տուտ պրիչոմ»…Յոթ ամիս ա՝ նստած ենք, իրանք իրանց համար «կայֆ են բռնում»:
Գաբրիելյանը «տրուբա բերող» ասելով նկատի ունի Էջմիածնի նախկին քաղաքապետ Երվանդ Աղվանյանի որդուն՝ Ռոբերտ Աղվանյանին, որն այս գործով ձերբակալվել է Վրաստանում, սակայն ՀՀ արտահանձնման մասին տեղեկություն դեռ չկա: «Իրան բռնեք-բերեք»,-ասաց Սանասար Գաբրիելյանը:
«Տրուբա տեղափոխողն» էլ մեկ այլ՝ փաստաթղթերի կեղծման գործով մեղադրյալ Հրաչյա Մայիլյանն է:
Հիշեցնենք, որ ԼՂՀ պաշտպանության նախկին նախարար Սամվել Բաբայանին մեղադրանք է առաջադրվել այն բանի համար, որ նա դրդել է մի խումբ անձանց ապօրինի կերպով ռազմամթերք հանդիսացող «Իգլա» տեսակի դյուրակիր զենիթահռթիռային համալիր ձեռք բերելուն, փոխադրելուն և պահելուն, ինչպես նաև՝ փոխարկման արդյունքում ձեռք է բերել հանցավոր ճանապարհով ստացված գույք: Գործով մյուս մեղադրյալներն են Սանասար Գաբրիելյանը, Արմեն Պողոսյանը՝ հայտնի որպես «Ժորիկ», Կարեն Քոչարյանը, Անդրանիկ Քոչարյանը, Ժորա Զաքարյանը, Դավիթ Հարությունյանը:
Դատաքննությունը փաստաթղթերի հետազոտման փուլում է:
Լուիզա ՍՈՒՔԻԱՍՅԱՆ
