Սեպտեմբերի 24-ին Տավուշի մարզի Նոյեմբերյանի տարածաշրջանի սահմանամերձ Կոթի գյուղի միջնակարգ դպրոցում կայացավ «Սահմանապահ Կոթի» հիմնադրամի շախմատի փոխանցիկ գավաթի խաղարկություն: Այդ մրցաշարը դարձել է ավանդական, այն անցկացվում է 3-րդ անգամ:
Մինչեւ առաջնության սկսվելը դրա մասնակիցները ծաղիկներով այցի գնացին Կոթիի հարավային մուտքին հառնող զոհվածների հուշակոթող:
Կոթիի վարչական ղեկավար Ֆելիքս Մելիքյանից տեղեկացանք, որ մրցաշարին մասնակցում էին Կոթիի, Դիլիջանի, Իջեւանի, Աչաջրի, Ալավերդու, Նոյեմբերյանի,Հայաստանի շախմատի ակադեմիայի Նոյեմբերյանի մասնաճյուղի, Բերդավանի, Նոյեմբերյանի սահմանապահ զորամասի թիմերը: Յուրաքանչյուր թիմ ներկայացնում էր 4 շախմատիստ:
Մրցաշարի հաղթող է դարձավ եւ փոխանցիկ գավաթը նվաճեց Իջեւանի թիմը, 2-րդ տեղում Կոթիի, 3-րդում՝ Ալավերդու թիմերն են: Մրցաշարի մրցանակակիր թիմերի անդամներին տրվեցին դրամական պարգեւներ:
Մրցաշարը ցույց տվեց, որ Ադրբեջանի հետ 38 կմ սահման ունեցող Կոթին ոչ միայն պատերազմական առօրյա,սոցիալական խնդիրներ ունի, այլ նաեւ շախմատային գեղեցիկ ավանդույթներ, որոնք հաջողությամբ շարունակվում են:
Ոսկան ՍԱՐԳՍՅԱՆ
