ԵԱՀԿ Մինսկի խմբի համանախագահներ Իգոր Պոպովը (Ռուսաստան), Ստեֆան Վիսկոնտին (Ֆրանսիա) և Էնդրյու Շոֆերը (ԱՄՆ), ինչպես նաև ԵԱՀԿ գործող նախագահի անձնական ներկայացուցիչ Անջեյ Կասպրշիկը սեպտեմբերի 23-ին ՄԱԿ-ի Գլխավոր վեհաժողովի շրջանակում առանձին, հետո եռակողմ հանդիպում են ունեցել Հայաստանի և Ադրբեջանի արտգործնախարարներ Էդվարդ Նալբանդյանի և Էլմար Մամեդյարովի հետ: Այս մասին ասվում է համանախագահների տարածած հայտարարության մեջ:
Հանդիպման հիմնական նպատակն էր քննարկել հակամարտության գոտում ներկա իրավիճակը, ուղիներ փնտրել բանակցային գործընթացը վերսկսելու համար և նախապատրաստվել Հայաստանի և Ադրբեջանի նախագահների գագաթնաժողովին:
Համանախագահներն ակնկալում են, որ գագաթնաժողովը կնպաստի կողմերի միջև վստահության և քաղաքական կամքի ամրապնդմանը՝ համապարփակ լուծում գտնելու կարգավորման մնացած առանցքային խնդիրներին: Նախարարները պատրաստակամություն են հայտնել աշխատել համանախագահների հետ՝ մոտ ապագայում հաջող գագաթնաժողով կազմակերպելու ուղղությամբ:
Համանախագահները հանդիպել են նաև ԵԱՀԿ գլխավոր քարտուղար Թոմաս Գրեմինգերի և ՄԱԿ-ի գլխավոր քարտուղարի՝ քաղաքական հարցերով օգնական Ջեֆրի Ֆելթմանի հետ, որոնց հետ քննարկել են տեղերում իրավիճակը և խաղաղության գործընթացում վերջին զարգացումները, ինչպես նաև տեղեկացրել են բարձր մակարդակում հանդիպումների նախապատրաստման մասին:
Համանախագահները պատրաստվում են տարածաշրջան այցելել հոկտեմբերի սկզբին:
Պատրաստեց Վիկտորյա ԱՆԴՐԵԱՍՅԱՆԸ
