Կենտրոն եւ Նորք-Մարաշ վարչական շրջանների ընդհանուր իրավասության դատարանում այսօր «Իգլա»-ի գործով հերթական դատական նիստն է: ԼՂՀ պաշտպանության նախկին նախարար Սամվել Բաբայանին մեղադրանք է առաջադրվել այն բանի համար, որ նա դրդել է մի խումբ անձանց ապօրինի կերպով ռազմամթերք հանդիսացող «Իգլա» տեսակի դյուրակիր զենիթահրթիռային համալիր ձեռք բերելուն, փոխադրելուն և պահելուն, ինչպես նաև՝ փոխարկման արդյունքում ձեռք է բերել հանցավոր ճանապարհով ստացված գույք: Գործով մյուս մեղադրյալներն են Սանասար Գաբրիելյանը, Արմեն Պողոսյանը՝ հայտնի որպես «Ժորիկ», Կարեն Քոչարյանը, Անդրանիկ Քոչարյանը, Ժորա Զաքարյանը, Դավիթ Հարությունյանը: Սամվել Բաբայանին նաեւ փողերի լվացման մեղադրանք է առաջադրվել:
Փողերի լվացման դրվագով այսօր որպես վկա հարցաքննվեց Համիկ Իխտիարյանը, որն աշխատում է բանկում՝ որպես մասնաճյուղի կառավարիչ: Նա դատարանին հայտնեց, որ ճանաչում է գործով ամբաստանյալ Դավիթ Հարությունյանին, որը նրան դիմել է վնասված՝ գունավորված թղթադրամների հարցով:
«Հարցնում էր՝ ո՞նց կարելի է դրանք հանձնել: Ես էլ ասեցի, որ հետաքրքրվի, թե որ բանկում են ցածր տոկոսով դրանք վերցնում: Ցույց տվեց վնասված 20 եվրոյանոց թղթադրամ, ասաց, որ ընդհանուր մոտ 4-5 հազար եվրո կա վնասված: Թանաքոտ էին դրանք»,-պատմեց Համիկ Իխտիարյանը:
Թե որտեղից էր Դավիթ Հարությունյւանը ձեռք բերել այդ վնասված եվրոները, վերջինս չի հայտնել Իխտիարյանին:
Լուիզա ՍՈՒՔԻԱՍՅԱՆ
