Facebook ընկերության հիմնադիր Մարկ Ցուկերբերգը պատրաստվում է առաջիկա մեկուկես տարվա ընթացքում վաճառել ընկերության մինչև 75 մլն բաժնետոմս` բարեգործական նախագծեր ֆինանսավորելու համար։
«Մենք պատրաստվում ենք արագացնել մեր աշխատանքը և վաճառել մեր բաժնետոմսերի մեծ մասը ավելի շուտ։ Ես ակնկալում եմ, որ առաջիկա 18 ամսում մենք կվաճառենք Facebook-ի 35-75 մլն բաժնետոմս, որպեսզի շարունակենք մեր աշխատանքը կրթության, գիտության և իրավաբանության ոլորտներում»,- գրել է Ցուկերբերգը Facebook-ի իր էջում։
Ընդ որում, Ցուկերբերգը պատրաստվում է պահպանել ընկերության նկատմամբ վերահսկողությունը առնվազն 20 տարի։ Նրա խոսքով` ավելի վաղ ինքը դիմել էր ընկերության տնօրենների խորհրդին` խնդրելով թողարկել բաժնետոմսերի նոր ձև, որպեսզի ինքը հնարավորություն ունենա պահպանել ընկերության նկատմամբ վերահսկողությունը։ Սակայն այդ առաջարկն ավելի ուշ հանվել է հենց Ցուկերբերգի նախաձեռնությամբ, քանի որ ընկերության բաժնետոմսերի գներն աճել են արդյունավետ աշխատանքի արդյունքում։
Հիշեցնենք, 2015թ. դստեր ծնունդից հետո Ցուկերբերգը հայտարարեց, որ որոշել է իր բաժնետոմսերի 99 տոկոսը տրամադրել բարեգործության։
Պատրաստեց Վիկտորյա ԱՆԴՐԵԱՍՅԱՆԸ
