Ժողովրդի կողմից հայտնի եզան լեզուն կամ իսկական անունով հայտնի ջղախոտ մեծը շատ է օգտագործվում բնաբուժության մեջ:
Այս բույսով պատրաստուկներն ունեն խորխաբեր, հակաբորբոքային, մեղմ ցավազրկող, հակամանրէային, վերքերը լավացնող, սպազմոլիտիկ, մեղմ լուծողական ազդեցություն: Կիրառվում է բրոնխիտների, բրոնխիալ ասթմաների, կապույտ հազի, տուբերկուլյոզի բուժման ժամանակ: Տերեւների թարմ հյութն արդյունավետ է քրոնիկական գաստրիտների՝ ցածր թթվայնության, ստամոքսի եւ 12-մատնյա աղու խոցային հիվանդության ժամանակ:
Որպես խորխաբեր միջոց 1 ճաշի գդալ չորացրած տերեւներին ավելացնել 1 բաժակ եռման ջուր, թրմել 15 րոպե, քամել: Ընդունել 2 ճաշի գդալ՝ օրը 2-3 անգամ:
Բրոնխիտների դեպքում 2 ճաշի գդալ տերեւներին ավելացնել 1 բաժակ եռացրած սառեցրած ջուր, թրմել 8 ժամ, քամել: Ընդունել 1 բաժակը օրվա ընթացքում:
Ստամոքս-աղիքային տրակտի հիվանդությունների ժամանակ 25 գրամ մանրացված տերեւներին ավելացնել 1 բաժակ գոլ ջուր, թրմել 2 ժամ, քամել: Ընդունել 1 ճաշի գդալ՝ օրը 3-4 անգամ:
Ցածր թթվայնության գաստրիտների դեպքում 2 ճաշի գդալ սերմերին ավելացնել 1 բաժակ եռման ջուր, եռացնել մարմանդ կրակի վրա 10 րոպե, քամել: Ընդունել 1 ճաշի գդալ՝ օրը 1 անգամ:
Պատրաստեց ԱՆՈՒՇ ՄԱԹԵՎՈՍՅԱՆԸ
«Առավոտ» օրաթերթ
22.09.2017
