ԱՄՆ Կոնգրեսի ներկայացուցիչների պալատի անդամներ Դեյվիդ Վալադաոն, Ֆրանկ Փալլոնը և Թուլսի Գեբըրդը ներառվել են Ադրբեջանի ԱԳՆ «սև ցուցակում»՝ Արցախ այցելելու համար: Այս մասին հայտնում է ԱՊԱ-ն՝ վկայակոչելով Ադրբեջանի ԱԳՆ մամուլի խոսնակ Հիքմեթ Հաջիևին:
Հաջիևը նշել է, որ այդ անօրինական այցով ԱՄՆ Կոնգրեսի ներկայացուցիչների պալատի անդամները խախտել են միջազգային իրավունքի նորմերը և դրանով իսկ արդարացնում են «Հայաստանի կողմից ադրբեջանական տարածքների օկուպացումը, արյունալի էթնիկ զտումները ավելի քան 1 մլն խաղաղ ադրբեջանցիների նկատմամբ»:
«Ցավոք, այդպիսի անօրինական և կանխական գործողություններով նրանք հարված են հասցնում ԱՄՆ Կոնգրեսի հեղինակությանը ադրբեջանական և միջազգային հանրության աչքում: Հայաստանի և հայկական լոբբի հետ համատեղ իրականացված այդ գործողությունը նպաստում է ԵԱՀԿ ՄԽ ջանքերի զրոյացմանը»,- կարծում է Հաջիևը:
Պատրաստեց՝ Վիկտորյա ԱՆԴՐԵԱՍՅԱՆԸ
