Շենգավիթ վարչական շրջանի ընդհանուր իրավասության դատարանում այսօր «Սեֆիլյանի եւ մյուսների գործով» հերթական դատական նիստն է: Հիշեցնենք, որ «Հիմնադիր խորհրդարան» ընդդիմադիր շարժման առաջնորդ, Շուշիի առանձնակի գումարտակի հրամանատար Ժիրայր Սեֆիլյանը մեղադրվում է ապօրինի զենք-զինամթերք պահելու, հանցավոր նպատակներով խումբ ձեւավորելու, շենք-շինություններ զավթելու փորձի մեջ:
Այս նիստում շարունակվեց գործից անջատված մասով մեղադրյալ Սմբատ Գալոյանի հարցաքննությունը: Նա, հիշեցնենք, նախորդ նիստում դատարանին հայտնեց, որ 2015թ. ճանաչվել է հինգերորդ բանակային կորպուսի լավագույն հրամանատար, անդամակցել է Ժիրայր Սեֆիլյանի ստեղծած խմբին, սակայն ընթացքում է իմացել, որ այն զինված է եւ մտադրություն է ունեցել զորամաս զավթելու միջոցով ապստամբություն իրականացնել, ուստի ինքը որոշել է դուրս գալ այդ խմբից:
Ի տարբերություն նախորդ նիստում հարցաքննության, երբ Սմբատ Գալոյանը մանրամասն պատասխանեց մեղադրական կողմի հարցերին, այսօր նա հայտարարեց՝ օգտվում է իր իրավունքից եւ այլեւս չի պատասխանելու հարցերին: Հարցեր տալու հերթը պաշտպանական կողմինն էր:
Ժիրայր Սեֆիլյանի պաշտպան Մարինե Թովմասյանն էլ հայտարարեց՝ Սեֆիլյանը պետք է վերադարձվի նիստերի դահլիճ, որպեսզի վկային հարցեր հնչեցնելու իրավունքից օգտվի: Դատավոր Տաթեւիկ Գրիգորյանը չհամաձայնեց՝ ասելով, որ Սեֆիլյանն իր դիտավորյալ գործողություններով իրեն զրկել է այդ իրավունքից:
Հիշեցնենք, որ նախորդ նիստում նա դատարանի հանդեպ անհարգալից վերաբերմունքի համար կրկին հեռացվեց նիստերի դահլիճից:
Լուիզա ՍՈՒՔԻԱՍՅԱՆ
