Այսօր Եռաբլուրում մի տարեց կին մոտեցավ ԵԿՄ նախագահ Մանվել Գրիգորյանին, մի շարք փաստաթղթեր ցույց տվեց ու փող խնդրեց: Նրա խոսքերով՝ «պաշտպանության նախարարին դիմում եմ՝ ասում ա՝ տղեդ երկրապահի ծառա ա, թող Երկրապահը օգնի»:
Մանվել Գրիգորյանը պատասխանեց. «Բայց երկրապահը էս երկրին է ծառայում, իրա սեփական բանը չունի, որ տա»:
Կինն ասաց. «Տղես ազգին ա ծառայել, պետությանն ա ծառայել»: Մանվել Գրիգորյանն էլ, ցույց տալով ԵԿՄ-ականներին, ասաց՝ «Էս տղերքը ո՞ւմ են ծառայել, հլը հարցրա, ինձ չեն ծառայել, քե՛զ են ծառայել, քո համար»:
ԵԿՄ-ի աշխատակիցներից մեկն ասաց, որ բոլորին էլ օգնել են. «Ինչի՞ եք բողոքում, տիկին, չի կարելի զրպարտել, մեր պետությանը մի՛ զրպարտեք, մի՛ ցածրացրու մեր գեղեցիկ պետությունը»:
Կինը բողոքեց. «Հացի փող չկա, որ պերեդաչի տանեմ», իսկ գեղեցիկ պետության «թասիբին» կանգնող ԵԿՄ-ականին անվանեց «գործ տվող» եւ քծնող:
Գեներալ Մանվելը փորձեց հեռանալ, կինը հետեւից բղավում էր «Պարոն գեներալ, էս ի՞նչ եք անում, դեղի փող էի ուզում, հոսանքիս վարձը…»:
Գեներալ Մանվելը հազիվ էր իրեն զսպում, որ չհայհոյեր, անընդհատ ասում էր՝ «Ես քու էն…, արա գնա, է՛»:
Հռիփսիմե ՋԵԲԵՋՅԱՆ
