Ինչպես ավելի վաղ հայտնել էինք, 2016թ. Ոստիկանության ՊՊԾ գունդը գրաված եւ ծանր հանցագործությունների մեջ մեղադրվող «Սասնա ծռեր» խմբի անդամներից 14-ի գործով հերթական դատական նիստում այսօր ամբաստանյալների պաշտպաններից Արայիկ Պապիկյանը եւ Մուշեղ Շուշանյանը նիստերի դահլիճ չմտան, քանի որ դատարանի կարգադրիչներն, իրենց բնորոշմամբ, ոչ թե զննում են իրենց, այլ խուզարկում: Նրանց հանդեպ դատավոր Արտուշ Գաբրիելյանը սանկցիայի որոշում կայացրեց:
Այս փաստը հաշվի առնելով՝ 13 պաշտպաններ, այդ թվում՝ Լուսինե Սահակյանը, Արա Զաքարյանը, Նինա Կարապետյանցը, Արա Ղարագյոզյանը, Երվանդ Վարոսյանը, Դավիթ Գյուրջյանը, Հարություն Բաղդասարյանը, տեղում որոշեցին գործադուլ հայտարարել եւ նիստերի դահլիճ չմտան:
«Ամեն անգամ արգելում են մուտք գործել դահլիճ, փորձում են նվաստացնել մեզ: Սա արհեստական խոչընդոտ է, որ մեր փոխարեն հանրային պաշտպանների ներգրավեն: Նախագահող դատավորը պետք է միջոցներ ձեռնարկի, որպեսզի մեր գործընկերներն անարգել կատարեն իրենց աշխատանքը»,-լրագրողների հետ զրույցում իրենց քայլն այսպես բացատրեց փաստաբաններից Ինեսա Պետրոսյանը: Նա հավելեց՝ դեռ պարզ չէ, թե փաստաբանների գործադուլը որքան կտեւի:
Ի դեպ, գործադուլին չմիացան հանրային պաշտպաններ Արմինե Ֆանյանը, Գարեգին Մարգարյանը, Աննա Ջուվանովան:
Հիշեցնենք, որ «Սասնա ծռերի» պաշտպանները գործադուլ էին հայտարարել նաեւ նախորդ նիստում:
Լուիզա ՍՈՒՔԻԱՍՅԱՆ
