Ադրբեջանի ԱԳՆ-ն ոչ բարեկամական է համարում Ռուսաստանի գերագույն դատարանի կողմից «Համառուսական ադրբեջանական կոնգրես» հասարակական կազմակերպությունը լուծարելու մասին որոշումը: Այս մասին, ինչպես հաղորդում է Interfax.az-ը, հայտարարել է Ադրբեջանի ԱԳՆ մամուլի խոսնակ Հիքմեթ Հաջիևը:
Ռուսաստանի Գերագույն դատարանը երեքշաբթի անփոփոխ է թողել նշված կազմակերպությունը լուծարելու մասին առաջին ատյանի դատարանի որոշումը:
«Մենք քաղաքական կողմից այդ որոշումը գնահատում ենք որպես ոչ բարեկամական քայլ: Այդ որոշումը լուրջ հարված է հասցնում երկու երկրների ռազմավարական համագործակցությանը բարձր մակարդակներում»,- ասել է Հաջիևը:
Նա ընդգծել է, որ դժվար է հասկանալ ռուսական դատարանի որոշման պատճառները: «Մինչ ոչ ճիշտ որոշում է կայացվում Ռուսաստանում ադրբեջանական համայնքի ներկայացուցիչների նկատմամբ, Ռուսաստանի հայերի միությունը վայելում է լիակատար աջակցություն և շարունակում է իր գործունեությունը: Ցանկացած դեպքում, մենք զարմացած ենք, ցավում ենք, որ որոշում է կայացվել լուծարել Համառուսական ադրբեջանական կոնգրեսը»,- ասել է Հաջիևը:
Պատրաստեց՝ Վիկտորյա ԱՆԴՐԵԱՍՅԱՆԸ
