Այսօր տեղի ունեցած Վանաձորի համայնքի ավագանու նիստից հետո, քաղաքապետ Մամիկոն Ասլանյանն անդրադարձավ Վանաձորի ճոպանուղու խնդրին. «Որոշ մարդիկ իրենց չարախնդությունը կամ մեջի չարությունն ուզում են հանեն նման երեւույթներ ցույց տալով: Կարծես թե Վանաձորում հիմա ճոպանուղի կա, ճոպանուղին էլ քանդվում է: Երբ որ էդ ճոպանուղու ընդամենը 4 թե 5 սյուներն են կանգնած, իսկ այն, ինչը որ քանդման ենթակա է՝ կողքի կառույցը, դա ոչ թե քանդման ենթակա է, այլ վտանգավոր է»:
Քաղաքապետն ասում է, որ թաղամասի բնակիչներն իրենց են դիմել, որպեսզի նշված կառույցը քանդեն, քանի որ այն երեխաների կյանքի համար վտանգ է ներկայացնում. «Շենքի 7 ընտանիքով դիմել են, որ այդտեղ երեխաներ են խաղում: Եթե հանկարծ, այդ երեխաներից մեկի քթից արյուն գար, էդ շինարարությունից ընկներ, էլի մեզ էին մեղադրելու»:
Մամիկոն Ասլանյանն ասում է, որ կառույցն իրենց չի պատկանում, իրենք միայն քանդման թույլտվություն են տվել. «Տուրիստական նախկին հանգրվանի սեփականատերը մենք չենք, դա արհմիությունների կոնֆեդերացիային է պատկանում: Մենք նրանց ոչ թե քանդելու առաջարկություն էինք արել, այլ գրել էինք, որ համապատասխան միջոցներ ձեռք առեք՝ անվտանգությունն ապահովելու համար: Իրենք էլ գրել են՝ մենք դիմել ենք մասնագետներին, եւ քանի որ դա վերականգնման կամ ամրացման ենթակա չէ, ուստի խնդրում ենք ձեր թույլտվությունը քանդելու համար: Մենք էլ այդ թույլտվությունը տվել էինք: Կարծես չպետք է տայինք այդ թույլտվությունը, որ հետո այդ ամբողջ պատմությունը մնար մեր ուսերին»:
Տաթեւիկ ՂԱԶԱՐՅԱՆ
