Իջեւանի տարածաշրջանի սահմանամերձ Բերքաբեր գյուղում խմելու եւ ոռոգման ջրի հիմնահարց ունի: Բերքաբեր համայնքի ղեկավար Արթուր Մադաթյանն ասաց, որ այս տարի իրենք միայն մեկ ամիս են ոռոգման ջուր ստացել Աճարկուտի անտառներից ձգվող ջրագծից: Նա ասաց, որ ջրագիծը մատակարարում է սարերից հոսող գետերի ջուրը, այդ ջուրը խմելու համար պիտանի չէ: Ջրատարը ձգվում է արդեն ձեւախեղված կիսախողովակներով, ջրագիծը խիստ մաշված է, նորոգելու խիստ կարիք ունի:
Ա. Մադաթյանի խոսքերով՝ Բերքաբեր գյուղի տարածքում գտնվող ջրի ներքին ցանցը եւս նորոգման խիստ կարիք ունի, տարիներ առաջ գյուղի ներքին ցանցը, ջրի բաժանարար գծերը տեխնիկական թերություններով են գործարկվել:
Բերքաբերը գտնվում է 1980թ. գործարկված, 45 միլիոն խորանարդ մետր տարողություն ունեցող Ջողազի ջրամբարի աջ ափին: Համայնքի ղեկավարին հարցրինք՝ հնարավո՞ր չէ խողովակ գցել ջրամբարի մեջ եւ ջրամղիչ պոմպի միջոցով լճից ոռոգման ջուր մղել Բերքաբերի ցանքերն ու այգիները: Նա ասաց, որ ջրամբարի աջ ափին տեղեր կան, որոնք արհեստական լճի ձախ ափին գտնվող ադրբեջանական հենակետերից պարբերաբար կատարվող գնդակոծություններից համեմատաբար ապահով են, սակայն պոմպի գործարկման համար նվազագույնը 15-20 հազար դոլարի չափով ներդրում պետք է արվի:
Նա հայտնեց նաեւ, որ սահմանամերձ Բերքաբերը խմելու ջրի խնդիր ունի: 534 բնակիչ ունեցող սահմանամերձ գյուղի բնակիչներն օգտվում են Բերքաբերի կենտրոնում գտնվող աղբյուրից: Այդ աղբյուրի ջուրը չի բավարարում, այդ պատճառով գյուղացիները իրար հետ պարբերաբար վիճում են:
Ա. Մադաթյանի վկայությամբ՝ այդ աղբյուրի ջուրը որակյալ չէ, սակայն այն բերքաբերցիների համար խմելու ջրի միակ աղբյուրն է:
Ոսկան ՍԱՐԳՍՅԱՆ
