Հայաստան-Սփյուռք համահայկական վեցերորդ համաժողովի մասնակիցներն այսօր այցելեցին Ծիծեռնակաբերդի Հայոց ցեղասպանության հուշահամալիր, ծաղկեպսակ դրեցին 1915 թվականի Հայոց ցեղասպանության զոհերի հիշատակը հավերժացնող հուշակոթողին եւ լռությամբ ու խոնարհումով հարգել մեկուկես միլիոն անմեղ զոհերի հիշատակը:
Այսօր նախատեսված էր նաեւ Թուրքիայի խորհրդարանում հայազգի պատգամավորի՝ Կարո Փալյանի ու քրեական հեղինակություն Արթուր Ասատրյանի՝ դոն Պիպոյի այցելությունը: Վերջինիս կողմից պետք է Ցեղասպանության թանգարան-ինստիտուտին նվիրաբերվեին Վատիկանի գաղտնի արխիվների հազվագյուտ փաստաթղթեր Հայոց ցեղասպանության վերաբերյալ:
Բայց այսօրվա այցելողների մեջ չկային ոչ՝ Արթուր Ասատրյանը, ոչ էլ Կարո Փայլյանը: Վերջինիս օգնականը միջոցառման կազմակերպիչներին տեղեկացրել էր, որ Կարո Փայլյանն այս օրերին եղել է լարված ու փոքր-ինչ վատառողջ է, չի կարող գալ:
Արփինե ՍԻՄՈՆՅԱՆ
Հ. Գ. Հայոց ցեղասպանության թանգարանի կայքէջն ավելի ուշ տեղեկացրեց. «Վատիկանում ՀՀ արտակարգ և լիազոր դեսպան Միքայել Մինասյանի աջակցությամբ և իտալահայ գործարար Արթուր Ասատրյանի միջոցներով ձեռք բերված Վատիկանի գաղտնի արխիվներում պահպանվող արժեքավոր փաստաթղթերից մի հատված այսօր հանձնվեց Հայոց ցեղասպանության թանգարան-ինստիտուտին:
Փաստաթղթերը Հայոց ցեղասպանության թանգարան-ինստիտուտի տնօրենի ժամանակավոր պաշտոնակատար Սուրեն Մանուկյանին փոխանցեց «Ծագումով հայեր» հաղորդաշարի հեղինակ Մանանա Հակոբյանը: Մանանա Հակոբյանը նշեց, որ այս պահին փաստաթղթերի մի մասն է թվայնացվել, իսկ մյուս մասի վրա մասնագետները դեռ աշխատում են»:
