Այս աղցանն այնքան հագեցնող եւ հարուստ է, որ կարող է լիարժեք ուտեստի տեղ անցնել:
Անհրաժեշտ մթերքները
Սմբուկ- 2 հատ
Տավարի փափկամիս- 200 գրամ
Ընկույզ- կես բաժակ
Սեւ սալորաչիր- 6-7 հատիկ
Բուսայուղ- կես բաժակ
Սոխ- 1 գլուխ
Սխտոր-2-3 պճեղ
Կարմիր քացախ կամ գինի- 1-2 ճաշի գդալ
Աղ եւ համեմունքներ` ըստ ճաշակի
Մայոնեզ կամ թթվասեր- 4-5 ճաշի գդալ
Պատրաստման եղանակը
Սմբուկները հարկավոր է կեղեւահանել, լավ լվանալ, չորացնել, կտրատել եւ տապակել բուսայուղի մեջ: Տապակած սմբուկները շարեք թղթե անձեռոցիկի վրա` ավելորդ ձեթից ազատվելու համար:
Նույն թավայում տապակեք նաեւ կտրատած փափկամիսը: Աշխատեք ընտրել առանց ջլերի, անյուղ մսակտոր, կարող եք նախապես կտրատել, համեմել եւ թողնել 1 օր` աղի, տարբեր համեմունքների մեջ:
Տապակեք մարմանդ կրակի վրա: Երբ միսը պատրաստ լինի, ավելացրեք կտրատած սոխն ու սխտորը, թողեք եւս 8-10 րոպե տապակվի, ավելացրեք գինին կամ քացախը` թողեք մի եփվի այնքան, որ հեղուկ մասն ամբողջությամբ գոլորշիանա, ավելացրեք ընկույզն ու սալորաչիրը, աղն ու համեմունքները, լավ խառնեք: Լցրեք որեւէ թասի մեջ, ավելացրեք նախապես տապակած սմբուկները, մայոնեզը կամ թթվասերը, նորից լավ խառնեք եւ մատուցեք` վրան զարդարելով թարմ կանաչիով, կամ նռան հատիկներով:
Բարի ախորժակ:
Պատրաստեց Մելանյա ԲԱՐՍԵՂՅԱՆԸ
