«Սեֆիլյանի եւ մյուսների» գործով դատական նիստից առաջ այսօր հերթական միջադեպը գրանցվեց փաստաբանի եւ կարգադրիչների միջեւ: Ամբաստանյալներից Ներսես Պողոսյանի շահերի պաշտպան, փաստաբան Արայիկ Պապիկյանի պայուսակի զննության ժամանակ մետաղորսիչ սարքն ազդանշան տվեց, սակայն Պապիկյանը հրաժարվեց բացել պայուսակը՝ ասելով, որ դրանում մետաղական մաս պարունակող արգելված իրեր չկան:
Ի վերջո, փաստաբանը ներս չմտավ՝ ընթերակայի եւ լրատվամիջոցների ներկայությամբ դատարկելով պայուսակի պարունակությունը եւ այդ մասին համապատասխան գրություն թողնելով դատավոր Տաթեւիկ Գրիգորյանին: Պարզվեց, որ նրա պայուսակում առկա իրերը չէին ազդանշան տալիս, այլ պայուսակի մետաղական շղթաները:
Փաստաբանը հայտարարեց, որ սա իր հանդեպ ապօրինի խուզարկություն է: Կարգադրիչներն էլ պնդեցին, որ իրենք չեն նայել նրա պայուսակի մեջ, նա ինքնակամ է այն դատարկել, եւ որ դա օրենքով սահմանված զննություն է:
Ի դեպ, դատարանի սրահում նկարահանման ժամանակ կարգադրիչներից մեկը խոչընդոտում էր լրագրողների աշխատանքը, հրում, ձայնը բարձրացնում:
Լուիզա ՍՈՒՔԻԱՍՅԱՆ
