Այսօր ԱԺ ճեպազրույցի ժամանակ լրագրողները ՀՅԴ խմբակցության ղեկավար Արմեն Ռուստամյանից հետաքրքվեցին, թե ինչ կարծիք ունի վերջին կրիմինալ իրադարձությունների, մասնավորապես՝ Վերնիսաժի մոտ տեղի ունեցած կրակոցների մասին: Հարցին՝ կարելի՞ է ասել, որ կրիմինալի գագաթնակետին ենք հիմա հասել՝ Ռուստամյանը պատասխանեց. «Չեմ կարծում գագաթնակետին, քննություն է ընթանում, տվյալները ունեն, վստահ եմ, որ պետք է ամեն ինչ անեն, որ դա բացահայտվի: Այդպիսի երեւույթներ միշտ էլ տեղի են ունենում, չեմ կարծում, որ համատարած կրիմինալիզացիայի մասին է խոսքը: Սովորական կենցաղային կամ ինչ-որ այլ հարցերի հետ կապված ռազբորկաներ են, որը կարող է տեղի ունենալ ցանկացած երկրում: Կարեւորն այն է, որ համապատասխան մարմինները կարողանան ժամանակին արձագանքել եւ բացահայտել, կանխել նման հնարավոր զարգացումները»:
Aravot.am-ը հետաքրքրվեց՝ այս կրիմինալ միջադեպի հետ կապված սոցցանցերում արդեն կարոտով են հիշում Վանո Սիրադեղյանին, պահանջում են, որ նա վերադառնա, արդյոք այստեղ դուք Վլադիմիր Գասպարյանի մեղքը տեսնո՞ւմ եք, թե՞ չէ, եւ Վանոյի վերադարձը դուք ուզո՞ւմ եք, թե՞ չէ: Արմեն Ռուստամյանը պատասխանեց. «Ամեն մեկն իր չափով պատասխանատու է, այդ թվում՝ պարոն Գասպարյանն իր չափով իր պատասխանատվությունը պետք է ստանձնի: Իսկ ես չեմ երազում Վանոյի ժամանակները, որովհետեւ այնպես չի, որ այն ժամանակ կրիմինալիզացիա չկար: Բավական է հիշեք հայտնի սպանությունները այդ ժամանակ կատարված: Այնպես չի, որ երազում եմ, որ այդ ժամանակները վերադառնան, եթե վերադառնան, նույն ընթացքն էլ լինելու է, այդտեղից է սկսում: Մի բան, որ ծուռ ես շարում,այդպես ծուռ էլ գնում է: Պետք է սկզբից ամեն ինչը ճիշտ իր տեղը դրվեր, համակարգը իր գործը պետք է կատարեր, այլ ոչ թե մեկի կամակատարը դառնար, որպեսզի մենք այսօր այս վիճակը չունենայինք»:
Հռիփսիմե ՋԵԲԵՋՅԱՆ
