ԱԺ-ի գրադարանի ցուցափեղկում նոր անուն է հայտնվել: Ցանկացողները կարող են ծանոթանալ ԱԺ նախկին նախագահ Գալուստ Սահակյանի «Ճանապարհ» գրքին: «Իրատեսը» ԳԱԼՈՒՍՏ ՍԱՀԱԿՅԱՆԻՆ հարցրեց՝ ինչու՞ է անցել գրական աշխատանքի` հընթացս շոշափելով նաև քաղաքական խնդիրներ:
-Ձեր պատկերացրածն այսպիսի՞ Հայաստանն էր:
-Բավականին մեծ աշխատանք է արվել, չնայած ունենք դեռ մի փոքր հատված սովյալ ժողովուրդ: Երբ ինձ հարցնում են, թե ինչ է երջանկությունը, ասում եմ՝ երջանկությունն այն է, երբ երջանիկ շրջապատում ես ապրում: Այսինքն, Հայաստանը դեռևս երջանիկ շրջապատ չունի: Հայաստանի որևէ քաղաքացի դեռ երջանիկ չէ, քանի որ շատ չքավոր մարդիկ կան:
-Պարոն Սահակյան, երբ Դուք եք դժգոհում երջանկության պակասից ու երջանիկ շրջապատի բացակայությունից, երբ հայտնի ֆիլմի հանգույն «Каждый день артиста видишь, академика видишь, космонавта видишь, Иштояна видишь», ի՞նչ ասի շարքային քաղաքացին:
-Այո, ոչ ոք չի հերքում, որ կա ժողովրդի մի զանգված, որ աղքատ է ու չի կարող նորմալ ապրել:
-Ինչպե՞ս է ստացվել, որ ունենք այդպիսի բևեռվածություն. մի կողմում օլիգարխներն են, մեծահարուստները, մյուս կողմում՝ օրվա հացի կարոտ քաղաքացին:
-Ես կուզենայի բոլորը հարուստ լինեին, բայց կցանկանայի, որ ժողովուրդն էլ ապրի: Հայաստանի վիճակն այսօր այնպիսին է, որ ինչ էլ անես, այդ աղքատությունը կպահպանվի:
-Այդ վիճակի համար չկա՞ն մեղավորներ:
-Իշխանությունը չէ մեղավոր, որ այդպես է:
-Ո՞վ է մեղավոր:
-Մենք ցամաքային ճանապարհ չունենք, չունենք ելք դեպի ծով: Աշխարհում չկա մի պետություն, որ նավահանգիստ չունենա: Պատճառները շատ են: Հիմա ասում են՝ փոխենք իշխանությունը, լավ՝ փոխեցիք, ու՞մ եք բերելու իշխանության: Որևէ մարդու անուն թող ասեն:
-Ուզում եք ասել` քաղաքական դաշտն այդքան ամայի՞ է, չկա՞ն պատասխանատու պաշտոնների համար համապատասխան կադրեր:
-Ես չեմ տեսնում այնպիսի քաղաքական թիմ, որի լիդերը կարող է ղեկավարել Հայաստանը:
-Պարոն Սահակյան, ՀՀԿ-ն այդ ի՞նչ մոգական ուժ ունի, որ ովքեր դառնում են այս կուսակցության անդամ, արագ հարստանում են, կառավարման սանդղակով արագ վեր բարձրանում:
-Վատ է, եթե օրենքը խախտելով են որևէ բանի հասնում: Բայց երբ հարցը հասնում է կոնկրետության, թե ով է այդպիսին, պատասխան չկա: Մի օրինակ ասեմ. մի լրագրող մի անգամ ասաց, թե կուզենար իր տունը իմ տան հետ փոխել: Եկավ, տունս տեսավ, ասաց. «Չէ, քո տունն ի՞նչ տուն է, իմը կարգին տուն է»:
-Փաստորեն, այդպիսի մեծահարուստ լրագրողներ կան մեր շրջապատում: Բայց Դու՞ք էլ եք դժգոհ Ձեր ֆինանսական վիճակից:
-Հայաստանում չկա մեկը, որ գոհ լինի իր վիճակից:
Ռուզան ԽԱՉԱՏՐՅԱՆ
Հարցազրույցն ամբողջությամբ՝ «Իրատես» թերթի այսօրվա համարում
