Ինչպես հայտնի է` ապրիլյան քառօրյա պատերազմի ժամանակ Ադրբեջանի կողմից իրականացված հանցագործությունների մասին ՀՀ քաղաքացիների կողմից հայցեր էին ներկայացվել Մարդու իրավունքների եվրոպական դատարան:
Այսօր խորհրդարանում լրագրողների հետ զրույցում ՀՀԿ խմբակցության պատգամավոր, ՄԻԵԴ-ում ՀՀ ներկայացուցիչ Գևորգ Կոստանյանն ասաց, որ ներկայացված հայցերով անխոցելի հիմքեր ունեն եւ ամբողջական են:
Նկատի ունենալով նախադեպային իրավունքի դրսեւորումները` ՄԻԵԴ-ում ՀՀ ներկայացուցիչն ասում է`հայցերի առումով կանխատեսելիությունն ակնհայտ է. «Մեր հիմքերը բավական անխոցելի են, ապացույցները՝ բավական պինդ ու ամբողջական: Դրանք հիմնավորում են, որ ապրիլյան պատերազմի ընթացքում Ադրբեջանի կողմից, Ադրբեջանի ԶՈւ կողմից իրականացվել են կյանքի իրավունքի դեմ քայլեր, եղել են խոշտանգումների դրսևորումներ, մարմնական վնասվածքներ, գույքի ոչնչացում: Սա մարդու իրավունքների խախտման փաստերի մի ամբողջ կոմպլեքս է: Մենք ակնկալում ենք, որ ՀՀ քաղաքացիների կողմից ներկայացված հայցերը հիմնավոր կգտնվեն, և այնպես չէ, որ սա զուտ ցանկությունների դաշտից է, որովհետև ցանկացած օբյեկտիվ դիտորդ այս փաստերը նայելուց կհամոզվի, որ հայցերը բացարձակ հիմնավոր են»:
Ի դեպ, բոլոր հայցերով Հայաստանը ներգրավված է երրորդ կողմ:
Նելլի ԳՐԻԳՈՐՅԱՆ
