Այսօր խորհրդարանում քննարկվեց «ՀՀ կառավարության եւ Բրազիլիայի կառավարության միջեւ տեխնիկական համագործակցության մասին համաձայնագիրը» վավերացնելու հարցը:
Արտաքին հարաբերությունների հանձնաժողովի անդամ Արտակ Զեյնալյանը, որը հարակից զեկուցող էր, ասաց, որ մեկ դեմ ձայնով հանձնաժողովը դրական եզրակացություն է տվել նախագծին, եւ դեմ է եղել ինքը:
ԱԺ նախագահ Արա Բաբլոյանը հայտարարեց. «Կարծում եմ՝ ժողովրդավարության դասական օրինակ է, որ հանձնաժողովը մեկ դեմ ձայնով տվել է դրական եզրակացություն, բայց տվել է հնարավորություն, որ այդ դեմ քվեարկողը լինի նախագծի հարակից զեկուցողը»:
«Ելք» խմբակցության ղեկավար Նիկոլ Փաշինյանը Բաբլոյանին ուղղեց. «Ժողովրդավարության գենետիկ բնորոշումը, այսինքն, եթե մենք ուզում ենք իմանալ դա ժողովրդավարություն է, թե չէ՝ դա իշխանության փոփոխության հնարավորությունն է՝ առանց բռնությունների: Ես ուզում եմ հիշեցնել, որ Հայաստանի անկախության ողջ պատմության ընթացքում բոլոր ընտրություններում հաղթել են գործող իշխանությունները: Սա ամենակարեւոր լակմուսն է՝ Հայաստանի ժողովրդավարությունը գնահատելու համար: Պուճուր աքսեսուարիկներ մենք ունենք՝ տոնածառի պուճուր խաղալիքներ, որ կարող ենք կախել ու ասել՝ վայ, տեսեք, բայց մեծ հաշվով դրանից ոչինչ չի փոխվում»:
Փաշինյանը նաեւ հետաքրքրվեց, թե որն է եղել պատճառը, որ հանձնաժողովում Զեյնալյանը դեմ է քվեարկել՝ նա պատասխանեց, որ օրենքին կցված հիմնավորումը կրում էր տեխնիկական բնույթ, բացակայում էին որոշ տեղեկանքներ, որոնք պետք է կցված լինեին նախագծին:
Հռիփսիմե ՋԵԲԵՋՅԱՆ
