ՀՀ կառավարությունը Վանաձորի փողոցների նորոգման համար հատկացրել Է 290 մլն դրամ: Ներքաղաքային ճանապարհների վերանորոգման մրցույթը արդեն իսկ կայացել է: Աշխատանքներն իրականացնելու հնարավորությունը ձեռք են բերել են ոչ վանաձորյան 3 կազմակերպություններ: Դրանք են՝ «Վարմաշ», «Հիդրո» եւ «Շինպլյուս» ՍՊԸ-ները:
Շուտով կվերանորոգվեն մարզկենտրոնի՝ Վարդանանց, Զորավար Անդրանիկ, Երեւանյան խճուղի, Հալաբյան, Աղայան, Մյասնիկյան, Նժդեհի, Շիրակացի, Թումանյան, Ներսիսյան, Զորյան, Տավրոսի 6-րդ փողոց, Լոռու հրապարակից մինչեւ Նարեկացու փողոց (կամուրջը ներառյալ) եւ Դեմիրճյան փողոցները:
Սրանք այն փողոցներն են, որոնք գտնվում են առավել անմխիթար վիճակում եւ քաղաքի երթեւեկության համար կարեւոր նշանակություն ունեն: Ճանապարհների մի մասը հիմնովին կասֆալտապատվեն, մի մասն էլ կվերանորոգվի փոսային նորոգման միջոցով:
-Նախատեսում ենք աշխատանքներն այս տարի ավարտել, մինչեւ անձրեւների ու ձյան գալը: Երեւի, կսկսեն կենտրոնական՝ Դեմիրճյան, Հալաբյան, Մյասնիկյան կամ Թումանյան փողոցներից: Հետո միաժամանակ բոլոր փողոցներում աշխատանքները կտարվեն, որ շուտ ավարտվեն: Չենք սպասելու, որ էս մի փողոցը վերջացնեն, մի 4 ամիս տեւի, հետո նոր մյուսը սկսեն: Միաժամանակ կվերանորոգեն,- ասում է Լոռու մարզպետարանի քաղաքաշինության վարչության տրանսպորտի եւ ճանապարհաշինության բաժնի պետ Վարդան Գեւորգյանը:
Նշված աշխատանքները մրցույթը շահած կազմակերպությունները կկատարեն 195 մլն դրամով. «Մնացած տնտեսած գումարն արդեն կառավարությունը կորոշի, թե ինչ պետք է անենք»,- ասում է Վարդան Գեւորգյանը:
Բաժնի պետը վստահեցնում է, հսկողություն է լինելու՝ աշխատանքները ժամանակին ու որակյալ կատարելու համար. «Տեխհսկողության համար նորից մրցույթ է լինելու, կազմակերպությունները մասնակցելու են շահեն: Եւ օրենքով սահմանված կարգով կկատարեն վերահսկողություն: Մարզպետարանն է պատվիրատուն եւ վերահսկելը մեր պարտականություն է, մենք նույնպես կհետեւենք աշխատանքներին»:
Բացի այդ, համայնքի փողոցների նորոգման համար այս տարի բյուջեից հատկացվել էր 100 մլն դրամ:
Հիշեցնենք, որ քաղաքի քարուքանդ փողոցների պատճառով բազմաթիվ վարորդներ են տուժել: Նրանցից մի քանիսը նույնիսկ դատարան են դիմել, պահանջելով վնասի փոխհատուցում:
220 կմ երկարություն ունեցող Վանաձորի ճանապարհների մեծ մասը հիմնանորոգվել են դեռեւս խորհրդային միության տարիներին: Տարիներ շարունակ վերանորոգվել են հիմնականում փոսային նորոգումների միջոցով: Վերջին անգամ քաղաքում հիմնանորոգման աշխատանքներ են կատարվել մի քանի տարի առաջ: Հիմնանորոգել են՝ Տիգրան Մեծ պողոտան, Թումանյան փողոցի մի հատվածը, Լոռվա եւ Թումանյան հրապարակները:
Տաթեւիկ ՂԱԶԱՐՅԱՆ
