Հոկտեմբերի 9-ին մեկնարկող Եվրախորհրդի խորհրդարանական վեհաժողովում Ադրբեջանի վերաբերյալ 2 զեկույցներ են քննարկվելու: Խորհրդարանում լրագրողների հետ զրույցում այդ մասին այսօր ասաց ՀՀ ԱԺ փոխնախագահ, ԵԽԽՎ պատվիրակության ղեկավար Արփինե Հովհաննիսյանը:
Ադրբեջանին վերաբերող առաջին զեկույցը քննարկվելու է իրավական հարցերի հանձնաժողովում: Խնդիրը վերաբերում է Ադրբեջանի լավագույն լոբբիստներից մեկին` բելգիացի պատվիրակ Ալան Դեստեքսին: Նրա անունը շոշափվում է նաեւ «ադրբեջանական լվացքատուն» անվանումը ստացած կոռուպցիոն հայտնի սկանդալում: Նա «Ադրբեջանի նախագահությունը Եվրոպայի Խորհրդում» զեկույցի հեղինակն է:
Ադրբեջանին վերաբերող երկրորդ զեկույցը կքննարկվի մոնիթորինգային հանձնաժողովում: Զեկույցը վերաբերում է Արդբեջանի ընդհանուր մոնիթորինգային պարտականությունների կատարմանը: «Մոնիթորինգի հանձնաժողովում հետաքրքիր քննարկում է եղել, զեկույցի համահեղինակ Ստեֆան Շենախն առաջարկել է, որ ինքը պետք է Բաքու այցելի և լրացումներ կատարի այդ զեկույցին: Տեսնենք, թե ինչ լրացում է ներկայացնելու: Ամեն դեպքում մոնիթորինգի հանձնաժողովում ևս անցել է Ադրբեջանի կոռուպցիոն սկանդալին վերաբերող մի դրույթ, որով վեհաժողովը մտահոգություն է հայտնում այդ հարցի վերաբերյալ և կոչ անում քննարկել»,- մանրամասնեց Արփինե Հովհաննիսյանը::
Նա հիշեցրեց, որ կոռուպցիոն հայտարարությունների հիման վրա գործունեություն ծավալող, հետաքննող մարմինն արդեն սկսել է իր գործունեությունը, պատվիրակները ներկայացրել են փաստաթղթերը, արդյունքներն առաջկայում կտեսնենք. «Բայց այս մարմինն արդեն բյուրոյում գաղտնի ռեժիմով հաստատել է նաև իր գործունեության կանոնները»:
Արփինե Հովհաննիսյանն ասաց նաեւ, որ ԵԽԽՎ-ում հայկական նոր պատվիրակությունը չի սահմանափակվի պաշտպանողական ռազմավարությամբ, ինչպես նախկինում էր. «Չես կարող փորձել ամողջությամբ ներգրավվել համաեվրոպական օրակարգ, երբ ունես այնպիսի թշնամի, ինչպիսին Ադրբեջանն է և այնպիսի լոբբիստներ, ինչպիսին Ադրբեջանի լոբբիստներն են: Որոշակի փոփոխություններ իմ տեսլականին համահունչ, եթե պատվիրակությունը համախոհություն դրևսորի, մենք կիրականացնենք»:
Նելլի ԳՐԻԳՈՐՅԱՆ
