Հայաստանի երիտասարդ ծանրորդներն այս օրերին Ծաղկաձորում նախապատրաստվում են հոկտեմբերի 15-ից 22-ը Ալբանիայում կայանալիք մինչեւ 20 եւ 23 տարեկանների Եվրոպայի երիտասարդական առաջնությանը:
Ծաղկաձորից հետո նրանք վերադառնալու են Երեւան եւ վերջին հավաքն անցկացնելու են «Օլիմպավանում»: Հայաստանի ծանրամարտի ֆեդերացիայի գլխավոր քարտուղար, ազգային հավաքականի գլխավոր մարզիչ Փաշիկ Ալավերդյանը դժվարանում է հիմա հայտարարել առաջնությանը մասնակցող հավաքականի վերջնական կազմը: «Քանի՞ մարզիկ կմասնակցի եւ ովքե՞ր կլինեն, դեռ պարզ չէ: Բոլոր թեկնածուներն էլ մարզվում են: Ամեն բան կախված է ծանրորդներից, նրանց վերջնական մարզավիճակից: Դեռ մեկ ամիս կա: Ընտրության հարցում կկողմնորոշվենք հավաքների ավարտին», – ասում է Փաշիկ Ալավերդյանը:
Աշոտ ՀԱԿՈԲՅԱՆ
