2016թ. Ոստիկանության ՊՊԾ գունդը գրաված եւ ծանր հանցագործությունների մեջ մեղադրվող «Սասնա ծռեր» խմբի անդամներից 14-ի գործով դատական նիստն այսօր սկսվեց առանց որոշ ամբաստանյալների: Նախորդ նիստերում նրանք դատարանի հանդեպ անհարգալից վերաբերմունքի համար սանկցիայի են ենթարկվել եւ որոշակի ժամանակահատվածով հեռացվել նիստերի դահլիճից:
Ամբաստանյալների պաշտպաններից 15 փաստաբաններ, այդ թվում՝ Լուսինե Սահակյանը, Երվանդ Վարոսյանը, Հարություն Բաղդասարյանը, Ինեսա Պետրոսյանը, Դավիթ Գյուրջյանը, Նինա Կարապետյանցը, Արայիկ Պապիկյանը, Տիգրան Հայրապետյանը նիստի չէին ներկայացել: Իսկ ահա հանրային պաշտպաններ Արմինե Ֆանյանը, Աննա Ջուվանովան եւ Գարեգին Մարգարյանը նիստերի դահլիճում են:
Հիշեցնենք, որ 182 փաստաբաններ գործադուլ են հայտարարել, եւ այսօր ոչ մի նիստի չեն մասնակցում՝ այդ կերպ բողոքելով դատարաններում, իրենց խոսքով, ապօրինի խուզարկությունների դեմ: Այդ մասին փաստաբան Երվանդ Վարոսյանը գրություն էր ուղարկել դատավոր Արտուշ Գաբրիելյանին՝ բողոքի ակցիայի մասնակից-փաստաբանների ցանկով: Արտուշ Գաբրիելյանն այն ընթերցելուց հետո ասաց, որ դատարանը փաստաբանների այդ քայլը դրական չի գնահատում եւ նրանց վարքագծին կանդրադառնա հաջորդ նիստում:
Պաշտպանների բացակայության պատճառով դատավորը նիստը հետաձգեց եւ նշանակեց հաջորդ չորեքշաբթի՝ 11 00-ին:
Լուիզա ՍՈՒՔԻԱՍՅԱՆ
