Դատարաններում փաստաբանների նկատմամբ իրականացվող զննություններից դեմ գործադուլ սկսած փաստաբաններն այսօր քննարկում են կազմակերպել իրավիճակից դուրս գալու տարբերակներ գտնելու համար:
Փաստաբան Երվանդ Վարոսյանի խոսքով, դատարաններում փաստաբանների նկատմամբ իրականացվող զննությունը երբեմն վերաճում է խուզարկության:
«Արդյոք կար անհրաժեշտություն կա Հայաստանում դատարան մտնող փաստաբաններին զննել, կա՞ որեւէ նախադեպ, երբ մի փաստաբան դատարան է տարել արգելված իր, փորձել է օժանդակել նախապատրաստվող հանցագործության կամ այլ իրավախախտման, իհարկե՝ ոչ: Հետեւաբար, կարծում եմ՝ կիրառվող գործողությունները հիմնավոր չեն ու կամայական մոտեցման արդյունք են»,- ասաց պարոն Վարոսյանը:
Նա անդրադարձավ նաեւ զննության, խուզարկության ձեւին, թե ինչպես է դա իրականացվում արվում. «Դա արվում է խիստ ստորացուցիչ կերպով, խուզարկության պահանջներ են ներկայացվում, որոնց շատ փաստաբաններ ընդդիմանում են: Իսկ չի կարող ստորացուցիչ չլինել, որովհետեւ փաստաբանները հասարակության մեջ իրենց ուրույն տեղն ու նշանակությունը ունեցող մարդիկ են, նրանց հետ նման կերպ վերաբերվելն անթույլատրելի է»:
Անդրադառնալով դատարան տանելու համար արգելված առարկաների ցանկ սահմանելու որոշմանը, որը հրապարակվեց երեկ, փաստաբանը հավելեց.«Գնալով ավելի եմ համոզվում, որ ավելի լավ է պետական մարմինները որեւ գործողություն չանեն, քան թե փորձեն լուծումներ գտնել»:
Արփինե ՍԻՄՈՆՅԱՆ
