«Որպես անձ` նա կրթված է եւ մականուն չունեցող: Որպես վարչապետ՝ չգիտեմ… կամ ինքը իր վրա չի վերցնում, կամ թույլ չեն տալիս իրական վարչապետ լինել»,-«Բլից ինֆո» մամուլի ակումբում այսօր ՀՀ վարչապետ Կարեն Կարապետյանի մասին այսպիսի կարծիք հայտնեց ՀՀՇ վարչության անդամ, միջազգայնագետ Հովհաննես Իգիթյանը: Հիշեցնենք, որ վաղը լրանում է վարչապետի գործունեության մեկ տարին:
«Նա ավելի շատ մենեջերի է նմանվում, որն անում է այն, ինչ թույլ են տալիս: Իսկ կարեւոր հարցերում, օրինակ՝ կոռուպցիայի եւ օլիգարխիայի վերացում, առաջընթաց չեմ տեսնում: Համաձայն չեմ այն ոճի հետ, երբ նախարարները նստած վախենում են, թե վարչապետը հեսա ձայն է բարձրացնելու իրենց վրա: Դա նշանակում է, որ դա թիմ չէ, այլ ուղղակի կա տնօրեն, որի առաջ նստած են վարձու աշխատողներ, որոնց կարող է նկատողություն անել կամ գործից հեռացնել»,-նկատեց Հովհաննես Իգիթյանը:
Մինչդեռ, նրա համոզմամբ, կառավարությունը քաղաքական գործիչների խումբ է. «Այն պետության ռազմավարություն է որոշում: Յուրաքանչյուրն իր ոլորտը պետք է առաջ տանի՝ չմտածելով՝ դա վարչաետին դուր կգա՞, թե ոչ»:
Լուիզա ՍՈՒՔԻԱՍՅԱՆ
