«Արցախի հարցում ռազմական գործոնը սկսում է գերիշխել Ադրբեջանի կողմից: Այսօր առաջնային խնդիրը այդ գործոնը չեզոքացնելն է: Սա է պատճառը, որ ԱՄՆ պետդեպը եւ ԵԱՀԿ Մինսկի խումբն իրենց հայտարարություններում ասում են՝ հակամարտությունը պետք է լուծվի խաղաղ ճանապարհով»,-«Բլից ինֆո» մամուլի ակումբում այսօր նման տեսակետ հայտնեց ՀՀՇ վարչության անդամ, միջազգայնագետ Հովհաննես Իգիթյանը:
Նրա բնորոշմամբ՝ Ադրբեջանը փորձում է ահռելի ռազմական ներուժը, որը հիմնականում ձեռք է բերել Ռուսաստանից, օգտագործել ԼՂՀ-ին եւ ՀՀ-ին վախեցնելու համար: «Նախագահների հանդիպում է նախատեսվում, բայց կարծում եմ՝ այն չի կայանա, եւ գործընթացը կսահմանափակվի սեպտեմբերին կայանալիք արտգործնախարարների հանդիպմամբ»,-նշեց Հովհաննես Իգիթյանը:
Անդրադառնալով ԵԱՀԿ Մինսկի խմբի արդեն նախկին ամերիկացի համանախագահ Ռիչարդ Հոգլանդի՝ Արցախյան հակամարտության կարգավորմանն առնչվող հայտարարությանը, Իգիթյանը համոզմունք հայտնեց, որ Կազանի փաստաթղթում ամրագրված սկզբունքներն արդիական չեն. «Հոգլանդն ուղղակի շեշտեց, որ մեծ աշխատանք են կատարել: Առաջնային է մեկ սկզբունքը՝ ԼՂՀ ժողովրդի անվտանգությունը: Միջազգային հանրությունն այս հարցն առաջնահերթ պետք է լուծի, եւ Հոգլանդի հայտարարության մեջ խոսվեց այդ հարցի մասին: Եթե նախկինում հարցը պետք է լուծվեր վերջում, ապա հիմա ասվում է, որ դա է առաջնայինը»:
Լուիզա ՍՈՒՔԻԱՍՅԱՆ
