«Հավաքների ազատության մասին» օրենքում փոփոխությունների նախագծով կառավարությունն առաջարկում է, որ դատավորները, դատախազները, քնիչները, ԶՈՒ-ի, ազգային անվտանգության ծառայողները հավաքների մասնակցելիս պետք է քաղաքական չեզոքություն եւ զսպվածություն ունենան եւ իրավունք չունեն մասնակցել ծառայողական համազգեստով:
Արդարադատության փոխնախարար՝ Կառավարության ներկայացուցիչն ասաց, որ գործող օրենքում նշված էր, օրինակ, որ Սահմանադրական դատարանի անդամը հավաքների մասնակցելիս պետք է պահպանի քաղաքական չեզոքություւն եւ զսպվածություն, հիմա ավելի բացել են փակագծերը:
«Ծառուկյան» դաշինքի պատգամավոր Սերգեյ Բագրատյանի (լուսանկարում) դիտարկմամբ՝ հակասական բառակույտ է նախագծում` եթե պիտի մասնակցի առանց համազգեստի, այսինքն, պիտի լրտեսի՞ հավաքի ժամանակ:
Սերգեյ Բագրատյանը հարակից զեկուցող Հրայր Թովմասյանին հարցրեց՝ ո՞վ է որոշում՝քաղաքական զսպվածությո՞ւն է ունեցել, թե՞ ոչ. «Ես գիտեմ, որ խմածության համար կա գործիք, որոշում են, բայց քաղաքական զսպվածությունն ու չեզոքությունը ո՞նց եք չափելու, խիստ կասկածելի է»: Հրայր Թովմասյանը պատասխանեց, որ որեւէ օրենք չպետք է վերածվի բացատրական բառարանի, գնահատողը վերջին հաշվով լինելու է դատարանը:
Սահմանադրական փոփոխությունների անվան տակ է կառավարությունը ներկայացնում այս փոփոխությունը: Էդմոն Մարուքյանը հարցրեց՝ գործող օրենքում ձեւակերպումը ինչո՞վ է հակասում նոր Սահմանադրությանը: Հրայր Թովմասյանն էլ ընդունեց, որ չի հակասում, ուստի անհասկանալի է, թե ինչու են փոխում ձեւակերպումը:
Հռիփսիմե ՋԵԲԵՋՅԱՆ
