Այսօր ԱԺ-ում քննարկվեց «Երեւան քաղաքում տեղական ինքնակառավարման մասին օրենքում լրացումներ եւ փոփոխություններ կատարելու մասին» նախագիծը, որը Սահմանադրական փոփոխություններով է ավելի շատ պայմանավորված:
«Ելք» խմբակցության ղեկավար Նիկոլ Փաշինյանը հարցրեց՝ ինչո՞ւ եք դուք որոշել տեղական հանրաքվե անցկացնելու նախաձեռնության իրավունքը Երեւանի ավագանու խմբակցությունների լիազորությունների շարքից հանել:
Տարածքային կառավարման եւ զարգացման նախարարի առաջին տեղակալ Վաչե Տերտերյանը (լուսանկարում) պատասխանեց, որ լրացուցիչ այդ հարցը կքննարկեն, բայց հիմնավորումն այն է, որ գործող օրենքով կար դրույթ, որ բոլոր հարցերը ավագանին դնում է պատգամավորների 1/3-րդով:
«Ելքի» պատգամավոր Մանե Թանդիլյանն ասաց, որ դա անընդունելի է, մենք դառնում ենք պառլամենտական երկիր, իբր պիտի քաղաքական փոքրամասնություններին ավելի շատ լծակներ տան, բայց վերցնում են լծակները:
Էդմոն Մարուքյանի խոսքով՝ օրենքով ավագանին գործիք ունի, որ կարող է նախաձեռնել հանրաքվե, հիմա էլ ասում են, որ 1/3-րդը կարող է նախաձեռնել, այսինքն, խմբակցության ձեռքից այս գործիքը վերցնում են: Հիմնավորումներում էլ սրա մասին որեւէ բան չկա:
Փաշինյանը նաեւ հետաքրքրվեց՝ նախկինում առաջարկ կար, որ ավագանու անդամների աշխատանքը վճարովի դարձնեին, դա ե՞րբ կլինի: Վաչե Տերտերյանը պատասխանեց, որ աշխատավարձ կստանան այն ժամանակ, երբ դրա հնարավորությունը կլինի:
Հռիփսիմե ՋԵԲԵՋՅԱՆ
