«Ծառուկյան» խմբակցության պատգամավոր Իվետա Տոնոյանը պարզաբանում է, թե ինչ հանձնարարականների մասին է խոսքը
– Տիկին Տոնոյան երեկ տեղի է ունեցել «Ծառուկյան» խմբակցության նիստ, որը վարել է ԲՀԿ նախագահ Գագիկ Ծառուկյանը եւ հանձնարարականներ է տվել: Կմանրամասնե՞ք`ինչ հանձնարարականներ են տվել Գագիկ Ծառուկյանի կողմից:
– Առաջին հերթին պարոն Ծառուկյանը հանձնարարել է պատգամավորներին` ցանկացած խորհրդարանական խմբակցության առաջարկին, նախագծին վերաբերվել հարգանքով և ամենայն մանրամասնությամբ քննարկել, վերլուծել և այդպես ձևակերպել սեփական դիրքորոշումը։ Մենք մշտապես պատրաստ ենք խորքային մասնագիտական քննարկումների, և միայն այդ ճանապարհով կձևակերպվի մեր տեսակետը, որը մենք կներկայացնենք մեր գործընկերներին և հանրությանը:
– Որո՞նք են լինելու «Ծառուկյան» խմբակցության առաջիկա անելիքները:
– Պարոն Ծառուկյանի հիմնական հանձնարարականներից մեկն էլ այն է եղել, որ «Ծառուկյան» խմբակցությունը ինքը պետք է հանդես գա մշակված, հիմնավորված առաջարկներով և նախագծերով։ Մենք չենք պատրաստվում միայն միանալ կամ չմիանալ այլոց առաաջրկներին: Մենք ինքներս հանդես ենք գալու մեր առաջարկների փաթեթով։ Եվ դրանք լինելու են, կրկնում եմ, փաստարկված, հիմնավորված և, երբեք չեն լինելու անհիմն և անիրականանալի։ Պարոն Ծառուկյանը տվել է հետևյալ ձևակերպումը. «Ծառուկյան» դաշինքի առաջարկները պետք է ունենան որակի նշան»: Այսինքն՝ ժողովուրդը պետք է տեսնի, որ դրա հետևում կա կատարված ահռելի աշխատանք, կա հիմնավորում, և արդյունքներն էլ բնականաբար կլինեն տեսանելի։
– Իսկ խմբակցության պատգամավորների աշխատանքը սահմանափակվելու է միայն ԱԺ պատերի ներսո՞ւմ, թե նրանք հասանելի են լինելու, հանդիպումներ են ունենալու ընտրողների հետ եւ այլն:
– Բնականաբար մեր աշխատանքը չի կարող սահմանափակվել միայն ԱԺ պատերի ներսում։ Մենք պետք է մշտապես շփումների մեջ լինենք հասարակության բոլոր խավերի հետ, բոլոր սոցիալական շերտերի հետ։ Մենք մշտապես պետք է համագործակցենք տարբեր խմբերի շահեր ներկայացնող հասարակական կազմակերպությունների և մասնագիտական կազմակերպությունների հետ՝ մշտապես խնդիրների պուլսին տիրապետելու և միասին լուծումներ գտնելու նպատակով։ Սա է արդյունավետ աշխատանք իրականացնելու միակ ճանապարհը: Սրանից զատ՝ մեր պատգամավորները հասարակության տարբեր շերտերին հանդիպումների ընթացքում և ԱԺ ամբիոնից պարբերաբար ներկայացնելու են մեր 15 կետերի դրույթները, մենք պատրաստ ենք տարբեր ձևաչափերով դրանք քննարկել, հիմնավորել դրանց անհրաժեշտությունը։ Մենք վստահ ենք, որ դրանց իրագործումից շահելու է պետությունը և ժողովուրդը։ Կարծում եմ, բոլորիս նպատակը պետք է դա լինի՝ ժողովրդի բարեկեցությունն ու բարօրությունը:
Զրույցը` Նելլի ԳՐԻԳՈՐՅԱՆԻ
