«Ազատ դեմոկրատներ» կուսակցության անդամ Արմեն Առաքելյանը բացառում է՝ օրեր առաջ Զովունի գյուղի սգո սրահում բռնկված հրդեհը լիներ որեւէ մեկի կողմից միտումնավոր արված քայլ: Հանգուցյալը Արմեն Առաքելյանի հորեղբայրն էր:
«Միտումը բացառում եմ, բայց մյուս կողմից այն, ինչ տեսա հրդեհից հետո, երբ վերջում իրավապահները թույլ տվեցին ներս մտնել, տեսնել՝ ինչ է կատարվել, շատ նման է դիտավորության: Բայց ինքն այնպիսի մարդ էր, որ այդ դիտավորությունը բացառված է: Արդեն քանի տարի է՝ ինքը մեկուսի իր ընտանիքով էր ապրում: Մոտ քսան տարի առաջ իրենք շատ երիտասարդ տղա կորցրին, ու դրանից հետո նրանց համար կյանքը վերջացավ:Այդ մի տղան ունեին, մի աղջիկ էլ ունեն, որ Հայաստանում չէ, դրսում է աշխատում, թաղմանը չէր կարողացել գալ: Ամբողջ կյանքը շինարար է եղել ու մեկուսի ապրում էր»,- Aravot.am-ին պատմեց Արմեն Առաքելյանը:
Սգո սրահում,ըստ լրատվամիջոցների, բռնկված հրդեհի պատճառով այրվել էր Առաքելյանի հորեղբոր դագաղը, հատակի գորգը:
«Դեպքը շատ նման էր դիտավորության, որովհետեւ հիմնական այրված մասն այնտեղ էր, որտեղ դիակն էր դրված: Հրդեհի բռնկման պատճառը ինձ համար հանելուկ է, մի բան է, որ բենզին, սալյարկա չեն լցրել, վառել, հոսանքից չի եղել, ու հրդեհը բոցով չի վառվել, դանդաղ է վառվել ու երկար ժամանակ, մոմերից էլ չի եղել, մոմերին ոչինչ չէր եղել, նույնիսկ չէն էլ հալել: Այնպիսի տպավորություն է, որ սիգարետ է եղել ու դանդաղ այրվել է»,- հավելեց պարոն Առաքելյանը ու չցանկացավ ասել, թե հրդեհի արդյունքում ինչ վնասներ էին պատճառվել: Նա ասաց՝ հետո կխոսի դրա մասին:
Արփինե ՍԻՄՈՆՅԱՆ
