Գյուղատնտեսության նախարար Իգնատի Առաքելյանը սեպտեմբերի 6-ին Տավուշի մարզ աշխատանքային այցի ժամանակ եղել է Լուսաձոր համայնքի վարչական տարածքում գտնվող «ՀիմնաՏավուշ» զարգացման հիմնադրամի անասնապահական համալիրում: Համալիրի ղեկավարները նախարարին հայտնել են, որ այնտեղ օրական վերամշակվում է 1500 լիտր կաթ, որից ստացված պանիրը եւ կարագն իրացվում են Հայաստանում, առաքվում Ռուսաստան:
«ՀիմնաՏավուշ» զարգացման հիմնադրամը Տավուշի մարզի գյուղերում ունի 7 փոքր անասնաֆերմա: Դրանից մեկը գտնվում է Բերդավան գյուղի տարածքով ձգվող Հայաստան-Վրաստան միջպետական ավտոճանապարհի ձախ եզրին, Կողբ համայնքի վարչական տարածքում: Այդ փոքր անասնաֆերմայի առաջ ծածանվում են ՀՀ-ի, Ֆրանսիայի Հանրապետության դրոշները եւ սպիտակ դրոշ, որի վրա ֆրանսերեն գրառում կա: Տեւական ժամանակ է, ինչ սպիտակ դրոշը պատռված է, այն չեն փոխում:
Նախկինում հայտնել ենք, որ Լուսաձորի անասնապահական ֆերմայից ծանր հոտ է տարածվում միջպետական ճանապարհին: Այդ ճանապարհին այժմ էլ զգացվում է անասնապահական համալիրից տարածվող ծանր հոտը:
Ոսկան ՍԱՐԳՍՅԱՆ
