Վրաստանի նախկին նախագահ, Օդեսայի նախկին նահանգապետ Միխեիլ Սաակաշվիլին հայտարարել է, որ ինքը Ուկրաինա է մտել օրինական ճանապարհով՝ ուկրաինական անձնագրով: Նրա խոսքով՝ ինքն իր անձնագիրը թողել է ավտոբուսում՝ Ուկրաինայի սահմանին, իսկ հետո ոստիկանությունը եկել և գողացել է այն:
«Երեկ ես լեհական սահմանը հատել եմ օրինական ուկրաինական փաստաթղթով, լեհերը դրա վրա կնիք են դրել, եկել եմ ուկրաինացիների մոտ, ինչպես օրենքն է պահանջում… Երբ մարդիկ ինձ ձեռքերի վրա Ուկրաինա էին մտցնում, ես անձնագիրս թողել էի ավտոբուսում: Ոստիկանությունը եկել է, խուզարկել ավտոբուսը և գողացել իմ անձնագիրը»,- ասել է Սաակաշվիլին Լվովում տեղի ունեցած մամուլի ասուլիսում:
Նա նշել է, որ այժմ իր անձնագիրը գտնվում է իրավապահների մոտ:
Պատրաստեց՝ Վիկտորյա ԱՆԴՐԵԱՍՅԱՆԸ
