Կառավարությունը ԱԺ է բերել օրենքի նախագիծ, որը ծափերով է ընդունում թե՛ իշխանությունը, թե՛ ընդդիմությունը: Խոսքը «Ավելացված արժեքի հարկի մասին» օրենքում փոփոխություններ կատարելու նախագծի մասին է, որով առաջարկվում է ԱԱՀ վերադարձ ապահովել ոչ միայն այն տնտեսվարողներին, որոնք ապրանք են արտահանում, այլեւ նրանց, որոնք ՀՀ-ում տնտեսական գործունեություն են իրականացնում եւ իրենց մատակարարների հարկային հաշիվներում ունեն ԱԱՀ-ի գումարներ: 2017-ի հուլիսի 1-ից սկսած ժամանակահատվածում նշված տնտեսվարողներից ովքեր վճարել են, նրանց գումարները հետ կվերադարձվեն: Սա լրացուցիչ շրջանառու միջոցներ կապահովի բիզնեսին: Ներկայումս, եթե տնտեսվարողը որոշի կառուցել գործարան, շինարարություն է իրականացնում, ունի մատակարարներից կատարված ձեռքբերումներ, հնարավոր է չհասցնի իրացնել արտադրածը կամ կառուցածը, այս պարագայում 5 ամսվա կտրվածքով այդ գումարները հետ են վերադարձվում:
ՀՀԿ խմբակցության քարտուղար Գագիկ Մելիքյանը, որը հարակից զեկուցող էր, ասաց, որ հանձնաժողովում քննարկումների ժամանակ բոլորը նախագծին խոսում էին միայն կողմ. «Ելքերը տանում էին մեկ տեղ՝ դեպի լավը»:
Իսկ «Ելք» խմբակցության պատգամավոր Արամ Սարգսյանը հայտարարեց. «Ես այս օրենքի ջատագովն եմ, այս օրենքի կողմնակիցն եմ: Պատրաստ էի նաեւ այս օրենքի հարակից զեկուցողը լինել, որովհետեւ հասկանում եմ, որ էս օրենքին սպասողները շատ են: Շատ ուրախ եմ, որ ՊԵԿ-ը այս անգամ կարողացել է այնպիսի օրենք բերել, որին դեմ քվեարկելը շատ ռիսկային է: Աշխատեք, որ դա սովորություն դառնա»:
Հռիփսիմե ՋԵԲԵՋՅԱՆ
