Կենտրոն եւ Նորք- Մարաշ վարչական շրջանների ընդհանուր իրավասության դատարանում շարունակվում է 2015 թվականի աշնանը Նորքում վնասազերծված զինված խմբի գործով դատական նիստը։ Գործը մեղադրյալների քննության փուլում է: Այսօրվա նիստում ցուցմունք տվեց նաեւ Անուշավան Գրիգորի Թադեւոսյանը: Վերջնս դատապարտվել է այս գործից առանձնացված մասով: Պատիժը կրում է «Արթիկ» ՔԿՀ-ում:
Անուշավան Թադեւոսյանը նույնպես հրաժարվեց դատարանում ցուցմունք տալուց: Այս դեպքում եւս հրապարակվեց մեղադրյալի նախաքննական ցուցմունքը: Սակայն նիստի ընթացքում նա սկսեց պատասխանել հարցերի: Իր պատասխաններն ակնհայտորեն տարբերվում էին նախաքննական ցուցմունքից:
Անուշավան Թադեւոսյանը տաքսու վարորդ է, մի քանի անգամ Արթուր Վարդանյանին ինչ-որ տեղ է տարել: Արթուր Վարդանյանի հետ էլ ծանոթացել է մեկ այլ տաքսու վարորդի`Հակոբի միջոցով:
«Քո հետ ինչ-որ մեկը հանցավոր համաձայնության եկե՞լ է»,- հարցրեց Արթուր Վարդանյանը: «Ես քո հետ ի՞նչ գործ ունեմ: Մենք ընդամենը նույն խցում ենք եղել»,- պատասխանեց Անուշավան Թադեւոսյանը:
«Առաջին անգամ Արթուրին գյուղ եմ տարել ու նա ինձ վճարել է հինգ հազար դրամ: Արթուրը ողջ ժամանակ խոսում էր հեռախոսով, բայց ես չեմ իմացել ում հետ»,-ասաց Անուշավան Թադևոսյանը`հավելելով, որ հետագայում շփվել է Արթուր Վարդանյանի հետ, համաձայնել է նրա առաջարկին`գնալ Քեսաբ եւ գումարի դիմաց կռվել: Այդ նպատակով ինքը նաեւ տարբեր մարդկանցից զենք է ձեռք բերել եւ վաճառել Արթուր Վարդանյանին:
Այսօր ցուցմունք տվեց նաեւ Մկրտիչ Սիմոնի Հովհաննիսյանը: Նա պատիժը կրում է «Նուբարաշեն» ՔԿՀ-ում: Մկրտիչը Խաչիկ Ավետիսյանի մարտական ընկերն է, վերջին հինգ տարիներին էլ բավական մտերիմ հարաբերությունների մեջ են եղել: Խաչիկ Ավետիսյանին փոխանցել է զենք`երեք ինքնաձիգ, բայց մեկը կոտրված է եղել, նաեւ`պայթուցիչներ: Խաչիկն էլ դա Քեսաբ պետք է տեղափոխեր: Դրանք իր մոտ մնացել էին արցախյան պատերազմից:
Ասում է` եթե իմանար, որ Խաչիկն ուզում է օդանավ գրավել կամ իշխանության յուրացման փորձ անել, ապա նրան զոռով կպահեր իր գյուղի տանը:
Մկրտիչ Հովհաննիսյանը Արթուր Վարդանյանին անձամբ չի հանդիպել ու չի ճանաչել:
Նելլի ԳՐԻԳՈՐՅԱՆ
