Նամակում IWF-ի նախագահը նշել է, որ 2017 թվականի աշխարհի առաջնությունում Հայաստանի հավաքականին որակազրկելու տեղեկությունն առայժմ ոչ պաշտոնական է:
«Մենք 2016 թվականի հունիսի 22-ին Թբիլիսիում կայացած ժողովում տեղեկացրել էինք ընդունված որոշման մասին: Ըստ այդ որոշման, պատժամիջոցներ պետք է կիրառել այն հավաքականների նկատմամբ, որոնց երեք եւ ավելի մարզիկների դոպինգ թեստերը դրական արդյունք են ունեցել 2008 թ. եւ 2012 թ. օլիմպիական խաղերի ժամանակ:
Այժմ համապատասխան հանձնաժողովը պետք է որոշում ներկայացնի գործադիր կոմիտեին: Որոշումը կհամարվի պաշտոնական միայն գործադիր կոմիտեի ժողովից հետո՝ ձեզ ուղարկված նամակով: Այդ մասին կհաղորդենք որքան հնարավոր է շուտ»:
Հայաստանի հակադոպինգային ծառայության ղեկավար Արեգ Հովհաննիսյանն ասում է, որ իրենք եւս տեղեկություն են ստացել ծանրամարտի միջազգային ֆեդերացիայից, որում նշված է, թե ստեղծվել է «Ծանրամարտի միջազգային ֆեդերացիայի մաքուր սպորտի հանձնաժողով», որը պետք է խնդիրը քննարկի սեպտեմբերի 12-ի իր ժողովում եւ առաջարկներ ներկայացնի միջազգային ֆեդերացիայի գործադիր կոմիտե:
Այդ առաջարկները վերջնական կքննարկվեն սեպտեմբերի 30-ին՝ Բուխարեստում կայանալիք միջազգային ֆեդերացիայի գործադիր կոմիտեի ժողովում:
Արեգ Հովհաննիսյանի կարծիքով՝ ֆեդերացիաներին կպատժեն ըստ դոպինգ թեստերի դրական արդյունքների քանակի եւ վերջին տարիներին մարզիկների վարքագծի:
Աշոտ ՀԱԿՈԲՅԱՆ
