«Սոսե» միջազգային կինոփառատոնի կազմակերպիչների համոզմամբ՝ հայկական ֆիլմարտադրությունը միջազգային շուկայում բավականաչափ մրցունակ չէ: Այդ մասին վերջիններս նշեցին «Հոդված 3» ակումբում կազմակերպված քննարկման ժամանակ:
Կինոփառատոնի ժյուրիի անդամ, կինոռեժիսոր Հովհաննես Գալստյանը համոզված է, որ խնդիրը ֆիլմարտադրության բովանդակության մեջ է. «Արդեն 2 տասնամյակից ավելի միջազգային շուկայում չկան հայկական ֆիլմեր: Մրցունակ չեն, քանի որ կա մթնոլորտի փոփոխության խնդիր: Պետք է զերծ մնալ ֆիլմարտադրության մեջ սխալ նորամուծություններից»:
Սեպտեմբերի 7-ից հոկտեմբերի 12-ը Հ. Մալյանի անվան կինոդերասանի թատրոնում և «Լոֆթ»-ում կկազմակերպվի փառատոնի ֆիլմաշարի դիտում: Այս անգամ տեղական ֆիլմարտադրողին տրվելու է նոր հնարավորություն՝ համագործակցել հոլիվուդյան iPitch.tv պլատֆորմի հետ:
«Փառատոնի բոլոր մրցանակակիրները կստանան iPitch.tv-ի վճարովի հաշվեհամար՝ հոկտեմբերի 10-ին անցկացվելիք մրցանակաբաշխության արդյունքում: Հեղինակները կկարողանան հոլիվուդյան հեղինակավոր հարթակներում ներկայացնել 5-7 րոպե տևողությամբ շնորհանդես իրենց ֆիլմերի բովանդակության և նկարահանման վերաբերյալ (Warner Brothers, Sony Pictures Entertainment Television, Discovery Network և այլն)»,- նշեց կինոփառատոնի հիմնադիր-տնօրեն Սիմոն Սահակյանը:
Փառատոնին կներկայացվի 131 ֆիլմ 39 երկրից, ևս 6 արտամրցութային ֆիլմ՝ Շվեյցարիայից: Նախատեսված է կինոդիտումներ կազմակերպել Տավուշի և Շիրակի մարզերում, «Հոդված 3» ակումբում, անցկացնել վարպետության դասեր: Մրցութային անվանակարգերում ևս փոփոխություն է տեղի ունեցել:
Կինոփառատոնի գեղարվեստական ղեկավար Ռիտա Խալաթյանի խոսքով՝ ավելացել է «Լավագույն երաժշտական ձևավորում» անվանակարգը:
Հիշեցնենք, որ սեպտեմբերի 7-ին ժամը 20:00-ին Հ. Մալյանի անվան կինոդերասանի թատրոնում տեղի կունենա «Սոսե» միջազգային կինոփառատոնի մեկնարկային կինոդիտումը, որի ընթացքում կցուցադրվի ռուս կոմպոզիտոր և դաշնակահար Սերգեյ Պրոկոֆևի օրագրի հիման վրա նկարահանված «Պրոկոֆև. ճանապարհին» ֆիլմը:
Նելլի ՊԵՏՐՈՍՅԱՆ
