Խորհրդային միության տարիներին Վանաձոր քաղաքում գործում էր 2 գետնանցում: Երկուսն էլ գտնվում են քաղաքի բանուկ հատվածներում՝ Տիգրան Մեծ պողոտայում եւ Վարդանանց փողոցում: Սակայն այսօր դրանցից եւ ոչ մեկն իր նպատակին այլեւս չի ծառայում: Գետնանցումները վերածվել են աղբանոցի եւ հասարակական զուգարանի:
-Գետնանցումները հիմա չեն աշխատում: Աղբանոց են դառել: Երեկոյան ժամերին էլ չգիտեմ թե ինչի է վերածվել,- ասում է վանաձորցի տիկին Կարինեն:
Նշված տարածքում են գործում նաեւ դպրոցներ եւ այլ հաստատություններ: Վանաձորցիների խոսքով գետնանցումն այսօր անհրաժեշտություն է:
-Էդ տարածքում եմ աշխատում ու անընդհատ անցնում եմ էդ փողոցով: Զգույշ եմ անցնում, մենք ենք մեքենաներին զիջում, մեքենաներն են մեզ զիջում, էդպես անցնում ենք: Մի քանի ամիս առաջ էդ անցումի վրա մի կնոջ գցեցին մեքենայի տակ: Ոչ՛ լուսացույց կա, ոչ՛ էլ երթեւեկությունը կարգավորող այլ ճանապարհային նշան: Հետո բանուկ տարածք է, երթեւեկությունը շատ խիտ էր: Վարորդներն էլ շատ վատ են քշում: Իսկ, որ գործեն գետնանցումները, շատ լավ կլինի, ժողովուրդն անվտանգ կանցնի փողոցը, առանց վախենալու, որ էսա մի մեքենա կգա ու կխփի: Ինձ թվում է ներսում առեւտուրն ու բիզնեսն էլ կզարգանա,- ասում է վանաձորցի Արմենը:
Տաթեւիկ ՂԱԶԱՐՅԱՆ
