Ըստ վարչապետի, Հայաստանի տարբեր բնակավայրերում, հատկապես՝ խոշոր քաղաքների՝ Երեւանում, Գյումրիում, Վանաձորում՝ մասնավոր ընկերություններին պատկանող բազմաթիվ շինություններ կան տարիներ շարունակ շինարարություն չսկսած հողամասեր, որոնք աղավաղում են բնակավայրերի տեսքը: Այսօր այս մասին վարչապետն ասաց կառավարության նիստում:
Նշված կիսակառույց եւ անավարտ շինարարության օբյեկտների անհրապույր տեսքից եւ շրջակա միջավայրի վրա բացասական ազդեցությունից խուսափելու, հանրապետությունում տնտեսական զարգացման համար բարենպաստ պայմաններ ստեղծելու, կառուցապատման ներդրումային գործընթացը խթանելու, ինչպես նաեւ զբոսաշրջության համար առավել գրավիչ միջավայր ձեւավորելու նպատակով, քաղաքաշինության պետական կոմիտեի նախագահին հանձնարարեց մարզպետներին եւ Երեւանի քաղաքապետի էլ առաջարկեց համատեղ, մեկամսյա ժամկետում գույքագրել քաղաքաշինական գործողության հատուկ կարգավորման տարածքներում ՀՀ միջպետական եւ հանրապետական նշանակության ճանապարհների վրա հանրապետության քաղաքների կենտրոնական մասերում առկա բոլոր նմանատիպ շինություններն ու հողամասերը՝ երկամսյա ժամկետում կառավարության աշխատակազմ առաջարկություններ ներկայացնելու, թե այդ շինությունների հետագա ճակատագրին ինչ է լինելու՝ գործող օրենսդրության համապատասխան:
Լուսինե ԲՈՒԴԱՂՅԱՆ
