Բաքվում տեղի է ունեցել Ադրբեջանի, Վրաստանի և Թուրքիայի արտգործնախարարների հանդիպումը, նախատեսվում է գալիք տարի կազմակերպել երեք երկրների նախագահների գագաթաժողով, հաղորդում է ԱՊԱ-ն:
Հանդիպման արդյունքում ընդունվել է «2017-2019թթ. եռակողմ համագործակցության ծրագիր», որում կողմերը, մասնավորապես հանդես են եկել տարածաշրջանային հակամարտությունների լուծման օգտին:
«Տարածաշրջանում շարունակվող հակամարտությունները վնաս են հասցնում տարածաշրջանային խաղաղությանը, կայունությանը և զարգացմանը, ուստի պետք է գտնել դրանց քաղաքական լուծում՝ հիմնված միջազգային իրավունքի վրա», – ասվում է ընդունված եռակողմ հայտարարության մեջ:
Արտգործնախարարները նաև աջակցություն են հայտնել միմյանց տարածքային ամբողջականությանը:
«Եվս մեկ անգամ ընդգծում ենք, որ անհրաժեշտ է շուտափույթ կարգավորել հակամարտությունը Լեռնային Ղարաբաղի տարածաշրջանում, Ադրբեջանի հարակից շրջաններում և Վրաստանում՝ հիմնված միջազգային իրավունքի նորմերի և սկզբունքների վրա՝ պահպանելով պետությունների ինքնիշխանությունը, տարածքային ամբողջականությունը, միջազգայնորեն ընդունված պետական սահմանների անձեռնմխելիությունը, ինչպես նաև՝ համապատասխան ՄԱԿ-ի, ԵԱՀԿ-ի և Եվրախորհրդի բանաձևերի և որոշումների»,- ընդգծել են նախարարները:
Հանդիպումից հետո տեղի ունեցած մամուլի ասուլիսում Ադրբեջանի արտգործնախարար Էլմար Մամեդյարովը հայտարարել է, որ հաջորդ տարի կարող է կազմակերպվել Թուրքիայի, Ադրբեջանի և Վրաստանի նախագահների գագաթնաժողով:
Նրա խոսքով՝ հանդիպմանը նախարարները որոշել են համապատասխան առաջարկ անել պետությունների ղեկավարներին:
Բացի եռակողմ հիմնական հանդիպումից՝ տեղի է ունեցել նաև երկկողմ հանդիպում Ադրբեջանի և Վրաստանի արտգործնախարարների միջև:
Նրանք նշել են, որ երկու երկրների համագործակցությունը էներգետիկ և տրանսպորտային ոլորտներում հնարավորություններ է ստեղծում լայնածավալ և փոխշահավետ նախագծերի իրականացման համար: Բացի այդ, ընդգծվել է երկու երկրների միջև ակտիվ համագործակցությունը Եվրոպայի էներգամատակարարմանն ուղղված Հարավային գազային միջանցքի իրականացման ուղղությամբ:
Նախարարները կարծիքներ են փոխանակել Բաքու-Թբիլիսի-Կարս երկաթուղու շինարարական աշխատանքները շուտափույթ ավարտին հասցնելու վերաբերյալ՝ նկատելով, որ ԲԹԿ-ի գործարկմամբ ապրանքաշրջանառությունը կավելանա: Դիվանագետները նաև նշել են, որ լայն հնարավորություններ կան Հյուսիս-հարավ տրանսպորտային միջանցքի զարգացման համար:
Պատրաստեց՝ Վիկտորյա ԱՆԴՐԵԱՍՅԱՆԸ
