Չինաստանում ՌԴ նախագահ Վլադիմիր Պուտինը ասուլիսի ժամանակ խոսելով ԱՄՆ-ի կողմից Ուկրաինա զենքի մատակարարման մասին՝ ասել էր. «Զենքի մատակարարումը հակամարտության գոտի՝ չի խոսում հաշտեցման օգտին, միայն խորացնում է իրավիճակը»:
Ուստի այսօր փոխարտգործնախարար Շավարշ Քոչարյանին հարցրեցինք՝ սրանից ելնելով մենք կարո՞ղ ենք ասել, որ Ռուսաստանը, զենք մատակարարելով մեր հակառակորդներին, չի ուզում, որ Արցախի հակամարտությունը հաշտեցմամբ լուծվի, նրան ձեռնտու չէ այդ տարբերակը: Շավարշ Քոչարյանը պատասխանեց. «Ժամանակին ռուսական կողմից հնչում էին ձայներ այն մասին, որ եթե իրենք չանեն, ապա այլ պետություններ կանեն: Ես ժամանակին իմ կողմից գաղափար էի առաջ քաշել՝ որքանով որ համանախագահող երեք պետություններն էլ ՄԱԿ-ի անվտանգության խորհրդի մշտական անդամ են, իրենք ունեն բավարար ներուժ, հնարավորություն, որպեսզի փորձեն հասնել նրան, որ լինի ընդհանուր էմբարգո՝ զենքի մատակարարումը այդպիսի գոտիներ, մասնավորապես՝ մեր մոտ: Այ դա կլիներ հարցի լուծում: Որեւէ պետություն չէր կարող ասել՝ եթե ես չեմ մատակարարում, ուրիշից կառնեն: Դա կլիներ համընդհանուր»:
Շավարշ Քոչարյանը նշեց, որ իհարկե, հասկանալի է, անվտանգության խորհրդում նման որոշում կայացնելը բարդ է, բայց, ըստ նրա, դա անհավանական չի, եթե շահագրգիռ լինեն հենց համանախագահ երեք պետությունները:
Հռիփսիմե ՋԵԲԵՋՅԱՆ
