2016թ. ոստիկանության ՊՊԾ գունդը գրաված եւ ծանր հանցագործությունների մեջ մեղադրվող «Սասնա ծռեր» զինված խմբի անդամներից 14-ի գործով դատական նիստում այսօր դատավոր Արտուշ Գաբրիելյանը որոշեց սանկցիա կիրառել ամբաստանյալների պաշտպաններ Լուսինե Սահակյանի եւ Մուշեղ Շուշանյանի հանդեպ, որոնք չէին ներկայացել՝ պատճառաբանելով, որ դատարանի կարգադրիչներն իրենց ոչ թե զննում են, այլ խուզարկում:
Արայիկ Պապիկյանն էլ դիմում էր հղել դատավորին՝ բացատրելով, որ դժգոհ է վերջինիս գործողություններից, եւ որ դատավորը պետք է դադարեցնի փաստաբանների հանդեպ ապօրինի գործողությունները:
Արտուշ Գաբրիելյանը որոշեց նրա հանդեպ էլ սանկցիա կիրառել՝ պատասխանատվության ենթարկելու մասին գրությամբ դիմելով ՀՀ փաստաբանների պալատին:
Ապա պաշտպաններից Արա Զաքարյանը միջնորդեց նիստը հետաձգել, քանի որ իր գործընկերները խուզարկվելու պատճառով չեն ներկայացել:
«Հորդորում եմ այդ պաշտպաններին հնարավորություն տալ իրականացնել պաշտպանություն եւ ձեւական խոչընդոտները վերացնել: Դուք աչք եք փակում այն փաստի վրա, որ կարգադրիչները մեզ թույլ չեն տալիս մտնել նիստերի դահլիճ»,-ասաց Արա Զաքարյանը դատավորին:
Այս միջնորդությանը դատավոր Արտուշ Գաբրիելյանը չանդրադարձավ, բայց միեւնույնն է՝ հետաձգեց նիստը, քանի որ Կարո Եղնուկյանը դիմում էր գրել առ այն, որ ցանկանում է Տիգրան Հայրապետյանից բացի՝ մեկ այլ պաշտպան ունենալ՝ Նինա Կարապետյանցին:
Առաջիկա նիստն ավանդաբար կկայանա հաջորդ չորեքշաբթի:
Լուիզա ՍՈՒՔԻԱՍՅԱՆ
