Այս տարի պետական պահպանության ծառայության (ՊՊԾ) զինծառայողները նախատեսվածից ավելի արտասահմանյան գործուղումներ են ունեցել, ինչի պատճառով էլ այս հիմնարկին լրացուցիչ գումարներ տրամադրելու անհրաժեշտություն է առաջացել: Այս մասին տեղեկանում ենք կառավարության նիստի օրակարգից:
Ֆինանսների նախարար Վարդան Արամյանը կառավարության նիստում, որը տեղի է ունենալու սեպտեմբերի 7-ին, վարչապետ Կարեն Կարապետյանին կհայտնի, որ այս տարի այս կառույցին կհատկացվի 50 միլիոն դրամ, որից 35 միլիոնը` պահուստային ֆոնդի հաշվին:
Պետական պահպանության ծառայության (չշփոթել ոստիկանության պարեկապահակային ծառայության հետ) գործառույթների մեջ մտնում է պետական պահպանության օբյեկտներին սպառնացող վտանգը կանխատեսելը եւ բացահայտելը, սպառնալիքների կանխարգելման համար համալիր միջոցառումներ իրականացնելը, պետական պահպանության օբյեկտների անվտանգությունն ապահովելը նրանց մշտական կամ ժամանակավոր գտնվելու վայրում, այդ թվում` երթեւեկության ընթացքում, իր իրավասության շրջանակներում ահաբեկչության դեմ պայքարին մասնակցելը, պահպանվող օբյեկտները պաշտպանելը, պահպանվող օբյեկտներում հանցագործությունները և այլ իրավախախտումները բացահայտելը, կանխելը եւ խափանելը եւ այլն:
Լուսինե ԲՈՒԴԱՂՅԱՆ
Լուսանկարում՝ Անկախության տոնի կապակցությամբ ՀՀ Սերժ Սարգսյանը 2016 թ.-ին պարգեւատրում է Պետական պահպանության ծառայության պետ Հրաչյա Հարությունյանին
