Մարդու իրավունքների եվրոպական դատարանը հերթական վճիռն է կայացրել ընդդեմ Հայաստանի Հանրապետության, ինչի հետեւանքով կառավարությունը ստիպված է լինելու դատավորների սխալ որոշումների համար հարկատուների գումարներից Ասատրյանին վճարել 4100 եվրո: Կառավարության սեպտեմբերի 7-ի նիստում արդարադատության նախարար Դավիթ Հարությունյանը վարչապետից գումար կխնդրի` Ասատրյանին վճարելու նպատակով: Այս մասին տեղեկանում ենք նիստի օրակարգից:
Գումարն Ասատրյանին կվճարվի «Կառավարման մարմինների գործունեության հետևանքով առաջացած վնասվածքների կամ վնասների վերականգնում» հոդվածով: Նշենք, որ քրեական դատավարության այս գործը, որի հիմքում եղել է մեքենայի տակ տեղադրված ռումբի պայթյունը, վարել է Երեւանի Ավան եւ Նոր Նորք վարչական շրջանների դատարանը, որից հետո անցել է Վերաքննիչ եւ Վճռաբեկ դատարաններով, սակայն դիմումատուի համար բավարար արդյունք չի տվել:
Համաձայն ՄԻԵԴ-ի որոշման, կառավարությունը պարտավոր է 4100 Եվրոն Ասատրյանին վճարել մինչեւ հոկտեմբերի 27-ը:
Լուսինե ԲՈՒԴԱՂՅԱՆ
