Էրեբունի եւ Նուբարաշեն վարչական շրջանների ընդհանուր իրավասության դատարանում այսօր Անդրիաս Ղուկասյանի գործով երկրորդ դատական նիստն է:
Անդրիաս Ղուկասյանին մեղադրանք է առաջադրվել այն բանի համար, որ նա 2016թ. հուլիսի 29-ին Երևանում կազմակերպել է զանգվածային անկարգություններ, ինչպես նաև փորձել է միանալ 2016թ. հուլիսի 17-ին ՀՀ ոստիկանության ՊՊԾ գունդը գրաված՝ շենքեր-շինություններ զավթած, ոստիկանների պատանդառած, ապօրինի հրազեն ու ռազմամթերք կրած անձանց, սակայն Ղուկասյանը հանցագործություններն ավարտին չի հասցրել՝ իր կամքից անկախ հանգամանքներով:
Երբ Անդրիաս Ղուկասյանին ոստիկանները բերեցին նիստերի դահլիճ, նրա հարազատներն ու համակիրները հետաքրքրվեցին, թե ինչպես է: Ղուկասյանը պատասխանեց՝ «մարտական», ապա ժպտալով ավելացրեց՝ «լիցքավորված» (ձեռքերով կրակելու շարժում ցույց տալով):
Մինչ նիստը կմեկնարկեր, նա լրագրողների հարցին ի պատասխան կարծիք հայտնեց իրեն առաջադրված մեղադրանքների մասին. «Երբ անձին մեղադրանք են առաջադրում, հանցակազմ պետք է լինի: Ինձ առաջադրված մեղադրանքում հանցակազմ չկա: Ես եկել եմ այստեղ, որ ես մեղադրեմ, որ հանրությունն իմանա՝ հուլիսյան դեպքերի պատասխանատուն իշխանություններն են»:
Դատավոր Վարդան Գրիգորյանն արձանագրեց, որ այս գործով կա 51 վկա եւ 36 տուժող, որոնք չէին ներկայացել նիստին (առաջին նիստը չէր կայացել): Դա որպես խոչընդոտ չդիտվեց, ապա Անդրիաս Ղուկասյանի պաշտպաններ Կարեն Մեժլումյանը եւ Ինեսա Պետրոսյանը հայտարարեցին, որ դատավորի ինքնաբացարկի միջնորդություն այս պահին չունեն:
Լուիզա ՍՈՒՔԻԱՍՅԱՆ
