«Մեր ըմբիշների մրցելույթներն աշխարհի առաջնությունում ստացված են: Մեդալները եւ հաղթանակները համարում եմ գերազանց արդյունք: Բայց, նաեւ չկա աշխատանք առանց բացթողումների»,- այսօր լրատվամիջոցների հետ հանդիպման ժամանակ հայտարարեց հունահռոմեական ըմբշամարտի Հայաստանի ազգային հավաքականի գլխավոր մարզիչ Լեւոն Ջուլֆալակյանը:
«Ընդհանուր առմամբ գոհ եմ աշխարհի առաջնությունում հավաքականի ելույթներից: Արթուր Ալեքսանյանի վրա մեծ ճնշում կար՝ վնասվածքներ, սայթաքում Եվրոպայի առաջնությունում: Բայց մենք մեծ սպասելիքներ ունեինք, եւ նա հերթական անգամ արդարացրեց իրեն: Արթուրն ապացուցեց, որ իր քաշային կարգում լավագույնն է:
Մաքսիմ Մանուկյանը բոլոր գոտեմարտերն անցկացրեց մեկ շնչով: Բոլորը հիացած էին: Նա միակ ըմբիշը դարձավ աշխարհի առաջնությունում, որ բոլոր գոտեմարտերում հաղթեց հնարքներով: Մաքսիմ Մանուկյանի եւ Արթուր Ալեքսանյանի հնարքներն այս առաջնությունում ճանաչվեցին ամենագեղեցիկը:
Մաքսիմը ըմբշամարտում լուրջ ճանապարհ է անցնել: Մինչեւ աշխարհի առաջնությունը նրան փորձարկել էինք 80 կգ քաշային կարգում եւ համոզվել, որ առավելություն ունի մրցակիցների նկատմամբ:
Վազգեն Խաչատրյանը 59 կգ քաշային կարգում շատ պետք է աշխատի: Նա հեռանկարային մարզիկ է:
Կարեն Ասլանյանը (66 կգ) լավ գոտեմարտեր անցկացրեց: Աշխարհի առաջնության 5-րդ տեղը գովելի արդյունք է: Նրա հետ զրուցել եմ, բացատրել թերությունները եւ սխալները շտկելու դեպքում, անպայման, արդյունքի կհասնի:
Զարմանալի, անհասկանալի էր Վարշամ Բորանյանի մասնակցությունը (71 կգ): Մարզիչներով վերլուծել ենք նրա գոտեմարտը: Հավանաբար, նա չկարողացավ քաշը ճիշտ կարգավորել, որքան էլ մենք այդ ուղղությամբ աշխատեցինք: Նա պետք է մեդալի համար պայքարեր:
75 կգ Կարապետ Չալյանից նույնպես մեդալի ակնկալիք ունեինք: Պարտվեց սերբ ըմբիշին, որը դարձավ աշխարհի չեմպիոն: Թեթեւ սայթաքում եղավ, որը լուրջ վրիպում ստացվեց: Ըմբշամարտի այսօրվա օրենքներն այդպիսին են: Մտածում էի, որ նա եզրափակչում կլինի: Ամեն դեպքում գոհ եմ Չալյանի մրցելույթներից:
85 կգ Արթուր Շահինյանը առաջին գոտեմարտում վստահ հաղթեց: Երկրորդում մրցավարները հաղթանակը տվեցին մրցակցին: Ամեն դեպքում, Շահինյանի առավելությունն իսկապես ակնհայտ էր»,- նշեց Լեւոն Ջուլֆալակյանը:
Աշոտ ՀԱԿՈԲՅԱՆ
