Ինչպես ավելի վաղ հայտնել էինք, սեպտեմբերի 22-ին Եվրանեսթ ԽՎ-ում ՀՀ ԱԺ պատվիրակության անդամները՝ պատվիրակության ղեկավար, ՀՀ ԱԺ արտաքին հարաբերությունների մշտական հանձնաժողովի նախագահ Արմեն Աշոտյանի գլխավորությամբ, Բաքվում կմասնակցեն Եվրանեսթ ԽՎ-ի սոցիալական, կրթության, մշակույթի և քաղաքացիական հասարակության հարցերի հանձնաժողովի կողմից կազմակերպված համաժողովին՝ նվիրված կանանց առողջության և գենդերային հավասարության խթանմանը: Հայկական պատվիրակության կազմում է նաեւ ԱԺ «ԵԼՔ» դաշինքի պատգամավոր Մանե Թանդիլյանը: «Եթե որոշվել է, որ համաժողովը կայանալու է Բաքվում, ապա մենք այդ համաժողովի լիարժեք անդամներ ենք, ուզում ենք եւ գնում ենք Բաքու: Գենդերային հավասարության հարցը կարեւոր է, եւ մենք բովանդակային օրակարգ ենք քննարկելու»,-«Սպուտնիկ Արմենիա» մամուլի կենտրոնում այսօր լրագրողների հետ հանդիպմանն անդրադառնալով սպասվելիք համաժողովին՝ ասաց Արմեն Աշոտյանը:
Նրա խոսքով՝ ինքը եւ Մանե Թանդիլյանը չմասնակցելու եւ իրենց տեսակետները չներկայացնելու խնդիր չունեն. «Այլ է հարցը, որ մեր մասնակցությունը հետաքրքրական է ներկայիս աշխարհաքաղաքական իրավիճակում՝ հաշվի առնելով Ադրբեջանի հայատյաց եւ մարդասպաններին հերոսացնելու քաղաքականությունը»:
Արմեն Աշոտյանը հայտնեց, որ երկու օր առաջ Ադրբեջանի խորհրդարանի գլխավոր քարտուղարի կողմից տրվել են համապատասխան անվտանգության երաշխիքներ՝ համաժողովի բոլոր մասնակիցների համար. «Սա հիմք է՝ մեր նախապատրաստական աշխատանքները շարունակելու համար: Հուսով եմ, որ ադրբեջանական կողմը կառուցողական կլինի՝ ապահովելու հայ մասնակիցների ֆիզիկական ներկայությունը Բաքվում եւ համաժողովի մասնակցության հավասարությունը: Ադրբեջանական որոշ լրատվամիջոցներ արդեն հիստերիկ արձագանք են տվել մեր նախատեսվելիք այցին, բայց մենք բարդույթներ չունենք ի տարբերություն իրենց»:
Լուիզա ՍՈՒՔԻԱՍՅԱՆ
