ԱՅՈ՛ ՕՐԻՆԱԿԱՆ ՋՐՕԳՏԱԳՈՐԾՄԱՆԸ
«Վեոլիա Ջու» ՓԲԸ հայտնում է իր բաժանորդներին ու սպառողներին, որ Վարձակալության պայմանագրով եւ ՀՀ ՀԾԿՀ-ի կողմից տրված թիվ ԼՋ 0001 Լիցենզիայով ստանձնած պարտավորությունների կատարման նպատակով ակտիվացնում է խմելու ջրի սպառման կանոնակարգմանն ուղղված աշխատանքը:
Այն բաղկացած է երկու բաղադրիչից.
Պայքար ապօրինի ջրօգտագործման դեմ,
Նոր համակարգերի կառուցում` համաձայն գործող կարգի:
Ստորեւ ներկայացվում է «Վեոլիա Ջուր» ՓԲԸ հայտարարությունը` իրականացվող աշխատանքների օրենսդրական հիմքերի ու բաժանորդ դառնալու համար ջրօգտագործողներին ներկայացվող պահանջների վերաբերյալ: Աշխատանքների ընթացքի ու արդյունքների մասին կտեղեկացվի պարբերաբար:
Ի ԳԻՏՈՒԹՅՈՒՆ
ՀԱՍԱՐԱԿՈՒԹՅԱՆ
2017 թվականի հունիսի 1-ին ՀՀ Կառավարության կողմից ընդունվել է թիվ 658 որոշումը` ՀՀ Կառավարության 2004 թվականի հունվարի 22-ի թիվ 130-Ն որոշումն ուժը կորցրած ճանաչելու եւ խմելու ջուրը ոռոգման նպատակով օգտագործման կարգավորման, խմելու ջրի մատակարարման համակարգերից խմելու ջրի ապօրինի սպառումը եւ ջրահեռացման (կեղտաջրերի մաքրման) համակարգերի ապօրինի օգտագործումն արձանագրելու մասին:
Նշված որոշման համաձայն` ապօրինի սպառումը առանց լիցենզավորված անձի կողմից համապատասխան տեխնիկական պայմանների տրամադրման ջրամատակարարման եւ (կամ) ջրահեռացման (կեղտաջրերի մաքրման) համակարգերին ինքնակամ միացումն է:
ՀՀ Կառավարության թիվ 658 որոշմամբ սահմանվում է, որ.
-Ապօրինի միացմամբ օգտագործված ջրամատակարարման եւ ջրահեռացման օրական քանակները հաշվարկվում է խմելու ջրի խողովակի ներանցման թողունակությամբ` ջրի շարժման 1,5 մ/վրկ արագությամբ եւ ջրամատակարարման հրապարակված համապատասխան տեւողությամբ:
– Հայտնաբերված ապօրինի միացումը ենթակա է անջատման (ջրազրկման, խցափակման)` ապօրինի միացում կատարած անձի հաշվին:
ՀՀ Հանրային ծառայությունները կարգավորող հանձնաժողովի կողմից 30.11.2016թ. ընդունված Խմելու ջրի մատակարարման եւ ջրահեռացման ծառայությունների մատուցման կանոնները սահմանելու մասին թիվ 378-Ն որոշման համաձայն` ջրամատակարարման եւ ջրահեռացման նոր համակարգը, դիմող անձի հայեցողությամբ, կառուցում է ջրամատակարարը կամ դիմող անձը: Նոր համակարգը կառուցվում է դիմող անձի հաշվին: Նոր համակարգի կառուցումը եւ Հայաստանի Հանրապետությանը դրա սեփականության իրավունքի անհատույց հանձնումն իրականացվում է Հայաստանի Հանրապետության օրենսդրությամբ սահմանված կարգով:
Դիմող անձի կողմից նոր համակարգը կառուցվում է մատակարարի տրամադրած տեխնիկական պայմանների հիման վրա: Նոր համակարգի կառուցման աշխատանքների տեխնիկական հսկողությունը, դիմող անձի հայեցողությամբ, իրականացնում է մատակարարը կամ մատակարարի պաշտոնական կայքում հրապարակված ցանկում ընդգրկված կազմակերպությունը` դիմող անձի հաշվին:
ՀՀ Կառավարության եւ ՀՀ Հանրային ծառայությունները կարգավորող հանձնաժողովի որոշումները, համաձայն «Իրավական ակտերի մասին» ՀՀ օրենքի 2-րդ հոդվածի` պաշտոնական գրավոր փաստաթղթեր են, որոնցով սահմանվում են պարտադիր ճանաչման, պահպանության, պաշտպանության, կատարման կամ կիրառման ենթակա իրավունքներ, պարտականություններ, պատասխանատվություններ, սահմանափակումներ կամ այլ կանոններ:
Հետեւաբար, նշված որոշումները ենթակա են պարտադիր կատարման, ինչպես «Վեոլիա Ջուր» ընկերության, այնպես էլ բոլոր շահագրգիռ ֆիզիկական ու իրավաբանական անձանց կողմից:
«Վեոլիա Ջուր» ՓԲԸ
