Կենտրոն եւ Նորք Մարաշ վարչական շրջանների ընդհանուր իրավասության դատարանում այսօր «Զինված խմբի գործով» հերթական դատական նիստն է:
Հիշեցնենք, որ ըստ մեղադրական եզրակացության՝ Արթուր Վարդանյանը 2015թ. ապրիլից ստեղծել ու ղեկավարել է ՀՀ քաղաքացիներից կազմված հանցավոր համագործակցություն, կազմակերպված խմբի կազմում ապօրինի կերպով ձեռք է բերել, պահել, փոխադրել և կրել է մեծ քանակությամբ զենք, ռազմամթերք, պայթուցիկ նյութեր, պայթուցիկ սարքեր` նպատակ ունենալով Հայաստանի Հանրապետությունում իշխանությունը յուրացնել: Նրա մտադրությունն ավարտին չի հասցվել. հանցավոր համագործակցության մեջ ներգրավված անձինք բացահայտվել ու 2015թ. նոյեմբերի 25-ին վնասազերծվել են ԱԱԾ աշխատակիցների կողմից:
Այս գործով մեղադրյալների թվում են Հայր Անտոն Դիկրան Թոթոնջյանը, որը, ըստ մեղադրանքի, ֆինանսավորել է Վարդանյանի ղեկավարած հանցավոր համագործակցությունը, նաեւ՝ Պաշտպանության նախկին փոխնախարար Վահան Շիրխանյանը:
Վերջինիս շահերի պաշտպան, փաստաբան Հայկ Ալումյանն այսօրվա նիստում միջնորդություն ներկայացրեց՝ Վահան Շիրխանյանի հանդեպ որպես խափանման միջոց կիրառված կալանքը վերացնելու կամ գրավով ազատ արձակելու վերաբերյալ:
Փաստաբանը հիմնավորեց, որ Շիրխանյանին կալանքի տակ պահելու հիմքերը ներկայումս նույնը չեն. «Նրա կալանավորման հարցը ենթակա է վերանայման: Պետք է հաշվի առնել, որ նա 70 տարեկան է, ունի լուրջ առողջական խնդիրներ, կալանավորված լինելու ընթացքում վիրահատվել է: Նրան կալանավորելու հիմքեր չկային ի սկզբանե»:
Դատավոր Արմեն Բեկթաշյանը, վերադառնալով խորհրդակցական սենյակից, որոշեց միջնորդությունը մերժել:
Լուիզա ՍՈՒՔԻԱՍՅԱՆ
